Dekabrın 21-də Sumqayıt Dövlət Universitetində (SDU) bu ali təhsil ocağının yaranmasının 50 illiyinə həsr olunmuş təntənəli tədbir keçirilmişdir.

AzərTAc xəbər verir ki, yubiley tədbirində Milli Məclisin deputatları, ölkənin ali məktəblərinin rektorları, tanınmış alimlər, şəhər ictimaiyyətinin nümayəndələri iştirak etmişlər.

Universitetin əməkdaşları əvvəlcə Fəxri Xiyabana gələrək xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini ehtiramla yad etmiş, məzarı önünə gül dəstələri qoymuşlar.

Görkəmli oftalmoloq alim, akademik Zərifə xanım Əliyevanın da xatirəsi ehtiramla yad olunmuş, məzarı üzərinə gül dəstələri düzülmüşdür.

Yubiley mərasimi SDU-nun akt zalında Azərbaycan Respublikasının dövlət himninin səslənməsi ilə başlanmışdır.

Sumqayıt Şəhər İcra Hakimiyyətinin başçısı Eldar Əzizov tədbiri açaraq Azərbaycan Prezidenti İlham Əliyevin təbrikini universitetin kollektivinə çatdırmışdır.

Eldar Əzizov SDU-nun zəngin və şərəfli tarixinə nəzər salmış, bu ali təhsil ocağının əməkdaşlarına gələcək fəaliyyətlərində uğurlar arzulamışdır.

Daha sonra çıxış edən təhsil naziri, professor Misir Mərdanov əlamətdar gün münasibətilə universitetin müəllim və tələbələrini  təbrik etmiş, Prezident İlham Əliyevin SDU-nun əməkdaşlarının təltif olunması haqqında müvafiq sərəncamlarını diqqətə çatdırmışdır. Nazir dövlətimizin başçısının sərəncamları ilə fəxri adlara və medallara layiq görülmüş əməkdaşlara müvafiq sənədləri və mükafatları təqdim etmişdir. O, həmçinin universitetin bir qrup əməkdaşının Təhsil Nazirliyinin fəxri fərmanı və “Qabaqcıl təhsil işçisi” döş nişanı ilə təltif edildiyini diqqətə çatdırmışdır.

Tədbir SDU-nun 50 illik inkişaf salnaməsini əks etdirən sənədli filmin nümayiş ilə davam etmişdir.

Sumqayıt Dövlət Universitetinin rektoru, professor Nadir Qəhrəmanov bildirmişdir ki, bu gün ölkəmizdə bütün sahələrdə olduğu kimi, təhsil sahəsində də ciddi inkişaf tendensiyası formalaşmışdır. Bu inkişaf dinamikası ulu öndər Heydər Əliyevin əsasını qoyduğu düşünülmüş strategiyanın nəticəsidir. Rektor inkişafın bu gün Prezident İlham Əliyev tərəfindən uğurla davam etdirildiyini vurğulamışdır.

Rektor son illərdə təhsilin keyfiyyətinin artırılması üçün universitetdə görülən işlər barədə məlumat verərək qeyd etmişdir ki, artıq SDU ölkənin aparıcı təhsil müəssisələrindən birinə çevrilməkdədir. Bildirilmişdir ki, dövlətimizin başçısının sərəncamları ilə universitetin əməkdaşlarının fəxri adlar və medallara layiq görülməsi ölkənin elm və təhsil işçilərinin, eləcə də Sumqayıt Dövlət Universitetinin əməkdaşlarının fəaliyyətinə verilən ən yüksək qiymətdir.

Azərbaycan Dövlət Neft Akademiyasının rektoru, akademik Siyavuş Qarayev, AMEA-nın birinci vitse-prezidenti, akademik Arif Həşimov, Qubadlı Rayon İcra Hakimiyyətinin başçısı Malik İsaqov, Təhsil İşçiləri Azad Həmkarlar İttifaqı Respublika Komitəsinin sədr müavini Mirzə Cəfərzadə, Lənkəran Dövlət Universitetinin rektoru, professor Asəf İsgəndərov, “Çağ Öyrətim İşlətmələri” şirkətinin rəhbəri Ənvər Özərən, Bakı Dövlət Universitetinin prorektoru, professor Aydın Kazımzadə, AMEA-nın Neft-Kimya Prosesləri İnstitutunun direktoru, professor Vaqif Abbasov, Azərbaycan Dövlət Dəniz Akademiyasının rektoru, professor Rasim Bəşirov və digərləri yubilyara təbriklərini çatdırmışlar.