Azərbaycan Diplomatik Akademiyasınının (ADA) bir qrup tələbəsi “Sağlamlıq keşikçiləri” devizi altında qanvermə kampaniyası təşkil etmişdir.

Akademiyadan AzərTAc-a bildirmişlər ki, bakalavr pilləsində təhsil alan gənclərin bu təşəbbüsü onlara ADA-da “Liderlik, kommunikasiya və işbirliyi” fənni üzrə verilən “sosial məsuliyyət”lə bağlı tapşırığın bir hissəsi idi.

Sinifdə vətəndaş cəmiyyətinin məsuliyyətli üzvləri kimi nə edə biləcəklərini müzakirə edən tələbələr qocalar, uşaq evlərinə ziyarətlər, ətraf ərazidə zibil və tullantıların təmizlənməsi və s. layihələr həyata keçirmişlər.

Layihələrdən biri də Azərbaycan Respublikası Səhiyyə Nazirliyinin Mərkəzi Qan Bankı ilə birgə qanvermə kampaniyasının keçirilməsi olmuşdur.

ADA-nın Tələbə Mərkəzində qurulan məntəqədə 60 nəfər könüllü - akademiyada təhsil alan yerli və xarici tələbələr, həmçinin müəllimlər iştirak edərək qan vermişdir.

Tələbələri dəstəkləmək üçün ADA-nın rektoru, xarici işlər nazirinin müavini Hafiz Paşayev də məntəqəyə baş çəkmişdir.

Layihənin icraçılarından bakalavr Orxan Süleymanov demişdir: “Elmi araşdırmalara görə, bir donorun verdiyi qan üç nəfərin həyatını xilas edə bilər. Biz burada iştirak edən bütün könüllülərə və Mərkəzi Qan Bankının əməkdaşlarına təşəbbüsümüzə qoşulduqlarına görə minnətdarlığımızı bildiririk”.