Azərbaycan Respublikasının Prezidenti yanında Dövlət İdarəçilik Akademiyasında (DİA) Rabitə və İnformasiya Texnologiyaları Nazirliyinin dəstəyi ilə yaradılan Elektron Hökumət Təlim Mərkəzinin açılışı olub.

Tədbirdə rabitə və informasiya texnologiyaları nazirinin müavini Elmir Vəlizadə, Akademiyanın rektoru Urxan Ələkbərov, professor-müəllim heyəti, müdavimlər, tələbə və magistrlər iştirak ediblər.  Mərkəz dövlət qulluqçularının, müdavim və tələbələrin təhsil imkanlarını genişləndirməklə yanaşı, informasiya-kommunikasiya texnologiyalarının (İKT) tətbiqi sahəsində yeni bilik və bacarıqların əldə edilməsinə də imkan yaradacaq.

Elmir Vəlizadə elektron xidmətlərin göstərilməsi üzrə işlərin dövlətin daim diqqət mərkəzində olduğunu, “Elektron Azərbaycan” Dövlət Proqramının və “Elektron hökumət” Fəaliyyət Proqramının əhəmiyyətini qeyd edib. İstifadəyə verilən təlim mərkəzinin həm dövlət qulluqçuları, həm də gənc idarəçi kadrlar üçün yeni praktik biliklər əldə edilməsinə və elektron idarəetmə vasitəsindən istifadə edərək inkişafın davamlı xarakterli olmasına töhfə verəcəyini bildirib.  

Mərkəzdə Rabitə və İnformasiya Texnologiyaları Nazirliyi tərəfindən bütün lazımi texniki avadanlıqla, o cümlədən yüksəksürətli internet çıxışı ilə təchiz edilən 25 nəfərlik müasir tədris sinfi yaradılıb. Auditoriya vasitəsilə dinləyicilər informasiya-kommunikasiya texnologiyalarına aid biliklərə,  elektron hökumət həllərini daha dərindən və səmərəli şəkildə yiyələnə bilmək imkanı əldə edəcəklər.

M.MÜKƏRRƏMOĞLU,
“Xalq qəzeti”