Sloveniyanın Nova Qoritsa şəhərinin  Çepovani qəsəbəsində Sovet İttifaqı Qəhrəmanı, həmyerlimiz Mehdi Hüseynzadəyə həsr edilmiş “Mixaylonun təkbaşına qisası” (“Jeden za vse Mihajlovo Mascevanje”) ikicildlik romanının təqdimatı olmuşdur.

Dünya Azərbaycanlı Gənclər Birliyindən (DAGB) AzərTAc-a bildirmişlər ki, sloveniyalı yazıçı Peter Ameliettinin müəllifi olduğu romanın təqdimat mərasimində “Onun təxəllüsü Mixaylo idi” adlı qısametrajlı sənədli film nümayiş etdirilmişdir.

Mərasimdə çıxış edən Azərbaycanın Sloveniyadakı müvəqqəti işlər vəkili Azər Xudiyev ölkələrimiz və xalqlarımız arasındakı dostluğun tarixindən danışmışdır. Bildirilmişdir ki, Mehdi Hüseynzadə Azərbaycan və Sloveniya xalqlarının qəhrəmanlıq rəmzidir.

Sonra müəllif  Peter Amelietti romanın məzmunu ilə bağlı iştirakçılara məlumat vermişdir. Əsərin Azərbaycan və Sloveniya gənclərinə vətənpərvərlik ruhunun aşılanmasına mühüm töhfə verəcəyi vurğulanmışdır.

DAGB-nin nümayəndəsi Günel Həsənova Azərbaycan xalqının Mehdi Hüseynzadənin xatirəsinə yüksək ehtiram göstərdiyini diqqətə çatdırmışdır. Bildirilmişdir ki, xalqımızı dərin məhəbbətlə sevdiyi qəhrəman övladının xatirəsi əbədiləşdirmiş, Bakının mərkəzində M.Hüseynzadənin abidəsi ucaldılmışdır.

İkinci Dünya müharibəsinin iştirakçıları, xüsusən də Mehdi Hüseynzadənin döyüşçü yoldaşları Mixaylonun hər iki xalqın qəhrəman övladı olduğunu bildirmişlər. Qeyd edilmişdir ki, M.Hüseynzadənin Sloveniyadakı muzeyi daim yerli xalq tərəfindən ziyarət olunur. Onun Çepovani qəsəbəsindəki məzarı üzərində həkk edilən “Rahat yat, Azərbaycan xalqının qəhrəman oğlu, əzizimiz Mehdi. Azadlıq naminə göstərdiyin ölməz rəşadət dostlarının qəlbində daim yaşayacaqdır” sözlərinin xalqlarımız, xüsusən də gənc nəsillər üçün əsl vətənpərvərlik örnəyi olduğu xüsusi vurğulanmışdır.

Mərasimdə Nova Qoritsa şəhərinin meri, Sloveniya Veteranlar Şurasının üzvləri, Mehdi Hüseynzadənin sloveniyalı döyüşçü yoldaşları, bu ölkənin Yazıçılar İttifaqının və yerli ictimaiyyətin nümayəndələri iştirak etmişlər.