Quba rayonunun II Nügədi kəndində Heydər Əliyev Fondunun təşəbbüsü ilə inşa olunmuş 360 yerlik tam orta məktəb binası istifadəyə verilmişdir.

AzərTAc xəbər verir ki, bu münasibətlə rayon ictimaiyyəti nümayəndələri, təhsil işçiləri, kənd sakinlərinin iştirakı ilə mərasim keçirilmişdir. Tədbirdə çıxış edənlər ölkəmizdə təhsilə göstərilən dövlət qayğısından, Prezident İlham Əliyevin və Azərbaycanın birinci xanımı, Heydər Əliyev Fondunun prezidenti Mehriban Əliyevanın təhsilin inkişafı sahəsində xidmətlərindən danışmışlar. Bildirilmişdir ki, yeni məktəb binasında ən müasir səviyyədə fənn kabinələri, laboratoriya, kompyuter və sinif otaqları, akt və idman zalları, bufet, kitabxana, istilik sistemi yaradılmış, lazımi inventar və avadanlıqla təmin olunmuşdur.

Qeyd edilmişdir ki, son illər Azərbaycanın hər yerində olduğu kimi, Quba rayonunda da orta ümumtəhsil müəssisələrinin tikintisi geniş vüsət almışdır. Diqqətə çatdırılmışdır ki, təkcə bu il Quba rayonunda 6 yeni məktəb binası və bir bağça tikilib istifadəyə verilmiş, daha 6 təhsil müəssisəsi isə inşa olunmaqdadır. 

Tədbirin sonunda məktəbin rəmzi açılışını bildirən lent kəsilmiş, mərasim iştirakçıları təhsil müəssisəsi ilə tanış olmuşlar.