Noyabrın 12-də Azərbaycan Milli Elmlər Akademiyası (AMEA) Rəyasət Heyətinin binasında AMEA-nın Biologiya və Tibb Elmləri Bölməsinin, akademiyanın Fiziologiya İnstitutunun birgə təşkilatçılığı ilə görkəmli fizioloq alim və elm təşkilatçısı, əməkdar elm xadimi, akademik Hüseyn Həsənovun 80 illik yubileyinə həsr edilmiş tədbir keçirilmişdir. 
AzərTAc xəbər verir ki, tədbirdə AMEA-nın Biologiya və Tibb Elmləri Bölməsinin akademik-katibi, akademik Əhliman Əmiraslanov ölkəmizdə elm, sənət xadimlərinin yubileylərinin keçirilməsinin bir ənənəyə çevrildiyini, əsası ümummilli lider Heydər Əliyev tərəfindən qoyulmuş bu ənənənin hazırda Prezident İlham Əliyev tərəfindən uğurla davam etdirildiyini bildirmişdir.
Akademik Ə.Əmiraslanov tanınmış alim və ictimai xadim, akademik Hüseyn Həsənovun elmə, təhsilə verdiyi töhfələrdən, Azərbaycan fiziologiya elminin inkişafında əvəzsiz xidmətlərindən danışmışdır.
Sonra AMEA-nın veteranlar şurasının sədri, akademiyanın müxbir üzvü Rafiq Qasımovun "Akademik Hüseyn Həsənovun həyatı və fəaliyyəti haqqında" mövzusunda məruzəsi dinlənilmişdir.
Bildirilmişdir ki, akademik Hüseyn Heydər oğlu Həsənov 1932-ci ildə Qərbi Azərbaycanda anadan olmuşdur. O, 1949-cu ildə İrəvan gimnaziyasını bitirmiş, həmin il Bakıya gələrək Azərbaycan Tibb Universitetinin biologiya fakültəsinə daxil olmuşdur.
H.Həsənov Azərbaycan fiziologiya elminin inkişafında böyük xidmətləri olmuş, çətin və şərəfli ömür yolu keçmiş alim bacarıqlı elm təşkilatçısı idi. 1968-ci ildə isə Fiziologiya İnstitutu yarananda H.Həsənov orada elmi işlər üzrə direktor müavini kimi fəaliyyətə başlamış, sonralar institutun direktoru vəzifəsinədək yüksəlmişdir. O, 27 il AMEA-nın Fiziologiya İnstitutuna rəhbərlik etmişdir.
Mərkəzi sinir sisteminin fiziologiyasının öyrənilməsində, fiziologiyanın tədqiqi üçün laboratoriyaların açılmasında böyük əmək sərf etmiş alimin əsərləri bir sıra xarici ölkələrdə çap olunaraq dünya elmi ictimaiyyətinin diqqətinə çatdırılmışdır. Akademik H.Həsənov SSRİ fizioloqları arasında böyük nüfuza malik idi. Məhz onun səyi nəticəsində SSRİ fizioloqlarının qurultayı Azərbaycanda keçirilmişdir.
Qeyd olunmuşdur ki, ölkəmizdə fiziologiya sahəsində nailiyyətlərin qazanılmasında əvəzsiz rol oynamış, qısa ömründə çox işlər görmüş görkəmli akademikin yetirmələri hazırda onun işini müvəffəqiyyətlə davam etdirirlər.
Tədbirdə AMEA-nın prezidenti, akademik Mahmud Kərimov, Bakı Dövlət Universitetinin professoru Əli Əliyev, Fiziologiya İnstitutunun əməkdaşları, professorlar Əli Allahverdiyev, Fəxrəddin Əsgərov, Azərbaycan Milli Aviasiya Akademiyasının professoru Arif Məmmədov, akademik Məmməd Salmanov və başqaları akademik H.Həsənovun elmi və pedaqoji fəaliyyətindən, yüksək insani keyfiyyətlərindən söz açmış, onunla bağlı xatirələrini bölüşmüşlər.