Oktyabrın 24-də Azərbaycan Milli Elmlər Akademiyasının (AMEA) Neft-Kimya Prosesləri İnstitutunda görkəmli alim, neft-kimya elminin banilərindən biri, akademik Yusif Məmmədəliyevin memorial-muzeyi əsaslı təmirdən sonra istifadəyə verilmişdir. 
AzərTAc xəbər verir ki, bu münasibətlə keçirilən tədbirdə mədəniyyət və turizm naziri Əbülfəs Qarayev, AMEA-nın prezidenti, akademik Mahmud Kərimov, Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev, Neft-Kimya Prosesləri İnstitutunun, Bakı Ali Neft Məktəbinin, ölkənin elmi və mədəni ictimaiyyətinin çoxsaylı nümayəndələri iştirak etmişlər.
Mərasimdə AMEA-nın prezidenti, akademik Mahmud Kərimov çıxış edərək Y.Məmmədəliyevin yaradıcılığı, elmi fəaliyyəti barədə məlumat vermişdir. Bildirmişdir ki, Y.Məmmədəliyev AMEA-nın əsasını qoymuşdur və iki dəfə bu qurumun prezidenti olmuşdur. Onun təşəbbüsü ilə akademiya şəhərciyi salınmış, elmi institutlar yaradılmışdır. Məhəmməd Füzuli adına Əlyazmalar İnstitutu onun strateji təşəbbüslərindən biri olmuşdur.
Dahi kimyaçı-nəzəriyyəçi Y.Məmmədəliyev Azərbaycanda neft kimyası elmi məktəbinin yaradıcısıdır. Onun işləyib hazırladığı texnologiyalar əsasında ölkənin neft-kimya sənayesi qurulmuşdur.
Mədəniyyət və turizm naziri Əbülfəs Qarayev bildirmişdir ki, Azərbaycan dövləti xalqımızın görkəmli şəxsiyyətlərinin xatirəsinə çox hörmətlə yanaşır. Prezident İlham Əliyev Azərbaycanın görkəmli xadimlərinin adlarının əbədiləşdirilməsi məqsədilə müvafiq fərman və sərəncamlar imzalamışdır. Bu gün Yusif Məmmədəliyevin memorial-muzeyinin açılması Azərbaycanda elmə verilən yüksək qiymət və bu sahədə çalışan insanlara göstərilən hörmətdir.
Tədbir iştirakçıları alimin iş kabineti əsasında təşkil olunmuş muzeyə baxış keçirmiş, burada aparılmış əsaslı təmir işlərindən sonra yaradılmış şəraitlə tanış olmuşlar. Bildirilmişdir ki, akademik Y.H.Məmmədəliyevin memorial-muzeyi hələ 1985-ci ildə, görkəmli alimin 80 illik yubileyi münasibətilə açılmışdır. Bu illər ərzində baxımsız vəziyyətə düşən muzeyin təmiri ilə əlaqədar işləri ARDNŞ öz üzərinə götürmüş və cari ilin iyun ayından etibarən əsaslı təmir-bərpa işlərinə başlanılmışdır. Muzey tam şəkildə təmir olunmuş, ən yeni texnologiyalarla təchiz edilərək istifadəyə verilmişdir. Memorial-muzeyin yeni dizaynı müasir standartlara cavab verir. Muzey iki bölmədən ibarətdir. Birinci bölmədə alimin həyat və yaradıcılığını əks etdirən çoxsaylı fotolar, akademikin yazı masası, kitab şkafı, şəxsi əşyaları yerləşdirilmişdir. Müasir texnologiyalara əsaslanan yeni dizaynda alimin həyat və fəaliyyəti, elmi yaradıcılığı haqqında hazırlanmış videomateriallar xüsusi telelövhələrdə təqdim olunur. Xüsusi texnologiyalarla hazırlanmış ayrı bir stenddə akademikin şəxsi fotoaparatı ilə çəkilmiş şəkillərdən hazırlanmış elektron fotoalbom yer almışdır. İkinci bölmədə isə alimin elmi yaradıcılığı illərində neft-kimya sahəsində əldə etdiyi uğurları əks etdirən stendlər yerləşdirilmişdir. Bundan əlavə, ikinci bölmədə akademikin raket yanacağının ixtira hüququnu təsdiqləyən patentləşdirmə sənədi, orden və medalları, Dövlət Mükafatı laureatının döş nişanı yerləşdirilmişdir.
Tədbirdə iştirak edən akademikin qızı Sevda Məmmədəliyeva ailəsi adından memorial-muzeyin təmir edilməsində əməyi olan hər kəsə, xüsusilə ARDNŞ rəhbərliyinə minnətdarlığını bildirmişdir.