"Çağ" Öyrətim İşlətmələri Şirkətinin "Qafqaz" Universitetində keçirdiyi illik toplantıda qurumun ötən təhsil ilindəki uğurlarına yekun vuruldu, beynəlxalq olimpiadaların qalibləri, ali məktəblərə yüksək ballarla qəbul olunanlar mükafatlandırıldılar. 
"Çağ" Şirkətinin prezidenti Ənvər Özərən qurumun Azərbaycanda 20 illik fəaliyyəti və keçən təhsil ilində əldə etdiyi başlıca nailiyyətlər barədə məlumat verdi, növbəti təhsil ilinin ümummilli lider Heydər Əliyevin anadan olmasının 90 illiyinə və Prezident İlham Əliyevin dövlət başçısı seçilməyinin 10 illiyinə həsr edildiyini bildirdi. "Çağ" rəhbərinin liseylərin və "Araz" kurslarının yetirmələrinin təhsil uğurları və həyata keçirilən layihələrdə fəal iştirakları barədə söylədikləri böyük maraqla qarşılandı.
Azərbaycan Respublikasının təhsil naziri Misir Mərdanovun "Çağ" şirkətinin ulu öndər Heydər Əliyevin böyük etimadını doğruldaraq ölkə təhsilinin önündə getdiyini vurğuladı, olimpiada qaliblərini, ali məktəblərə daxil olmuş məzunları təbrik etdi.
Toplantıda bildirildi ki, 1994-cü ildən bəri şirkətin yetirmələri beynəlxalq olimpiadalarda 169-u qızıl, 104-ü gümüş, 256-sı bürünc olmaqla 529 medal qazanmışlar. Bunun 55-i ötən tədris ilinin payına düşür. "Çağ" liseylərinin və "Araz" kurslarının yetirmələrinin böyük əksəriyyəti elə birinci il asanlıqla Azərbaycanın və xarici ölkələrin ali məktəblərinə daxil olurlar. Bu il də nəticələr yüksəkdir. Ali məktəblərə 600-dən yuxarı balla qəbul olunanların sayı 57 nəfərdir. "Araz" kursunun müdavimi Nərgiz Məzahirqızı ali məktəbə 700 balla daxil olmuşdur.
Məclisin sonunda şirkətin "təhsil ulduzları"na layiq görüldükləri mükafatları deputatlar, rəsmilər və tanınmış ziyalılar təqdim etdilər.

R.TAHİR, "Xalq qəzeti"