Bakı Dövlət Universitetinin (BDU) rektoru, Milli Məclisin deputatı, akademik Abel Məhərrəmov ABŞ-ın Stenford Universitetinin professoru, fizika üzrə Nobel mükafatı laureatı Laflin Robert Betts və həmin ölkənin kimya üzrə Nobel mükafatı laureatı Markus Rudolf Artur ilə görüşmüşdür.
Bakı Dövlət Universitetinin mətbuat və informasiya şöbəsindən AzərTAc-a bildirmişlər ki, görüşdə akademik A.Məhərrəmov BDU-nun yaranma və inkişaf tarixi, bu təhsil müəssisəsinin beynəlxalq əlaqələri, beynəlxalq qrant layihələrində iştirakı barədə məlumat vermişdir.
Nanotexnologiya və innovasiyalardan bəhs edən rektor azərbaycanlı alimlərin ABŞ-dan olan həmkarlarının bu sahədəki təcrübələrindən yararlandıqlarını da diqqətə çatdırmışdır.
Sonra Nobel mükafatı laureatları - Laflin Robert Betts BDU-nun fizika, Markus Rudolf Artur isə kimya fakültələrinin müəllim və tələbələrinə mühazirələr oxumuş, sualları cavablandırmışlar.
Qonaqlar BDU-nun nanoaraşdırmalar laboratoriyasında da olmuşlar.