Nəsimi rayonunda Müəllim Günü münasibətilə tədbir keçirildi.
Nəsimi Rayon İcra Hakimiyyətinin başçısı Nəsib Məhəməliyev təhsil işçilərini təbrik etdi və onlara şərəfli fəaliyyətlərində uğurlar arzuladı. O bildirdi ki, son illər ölkəmizdə bütün sahələrdə olduğu kimi təhsildə də böyük uğurlar qazanılıb. Azərbaycanda təhsilin səviyyəsi ildən-ilə artır, müasir tələblərə cavab verən təhsil müəssisələri inşa edilir, bu sahədə çalışan insanların əmək haqları mütamadi olaraq artırılır.
2011-2012-ci tədris ilində də Nəsimi rayonunda bu sahədə nailiyyətlər əldə edilib. 14, 266 nömrəli məktəblər və 16 nömrəli texniki humanitar lisey "İlin ən yaxşı ümumtəhsil məktəbi" müsabiqəsinin, 15 müəllim isə "Ən yaxşı müəllim" müsabiqəsinin qalibi olmuşlar. 6 nəfər "Əməkdar müəllim" adına layiq görülmüşlər.
Bu il rayon məktəblərini bitirmiş 1227 nəfər ali məktəblərə qəbul olunmuşdur. Onlardan 49-u 600-dən, 14-ü isə 650-dən yuxarı bal toplamışlar. 4 məktəbdə və 3 körpələr evi-uşaq bağçasında əsaslı təmir işləri görülmüş, 2 məktəbdə isə əlavə korpusların inşası həyata keçirilir.
Sonra bir qrup təhsil işçisinə əldə etdikləri uğurlara və rayonun ictimai həyatındakı fəaliyyətlərinə görə Nəsimi Rayon İcra Hakimiyyətinin fəxri fərmanları təqdim olundu.
Tədbirdə Milli Məclisin deputatı Məlahət İbrahimqızı iştirak edirdi.
H.Sarabski adına Mədəniyyət evi kollektivi tədbirdə böyük konsert proqramı ilə çıxış etdi.

Ayaz HƏMİDOĞLU, "Xalq qəzeti"