Azərbaycan Milli Elmlər Akademiyasının (AMEA) A.A.Bakıxanov adına Tarix İnstitutunun direktoru, AMEA-nın müxbir üzvü Yaqub Mahmudovun "Azərbaycan və Avropa: Ağqoyunlu dövründə qarşılıqlı əlaqələr (XV əsrin ikinci yarısında)" monoqrafiyası ABŞ-ın Los-Anceles şəhərində ingilis dilində nəşr edilmişdir. 
İnstitutdan AzərTAc-a bildirmişlər ki, beş fəsildən ibarət əsərdə Ağqoyunlu dövlətinə aid, müxtəlif dillərdə olan 260 mənbə və ədəbiyyatdan istifadə edilmişdir. Kitabda Azərbaycanın Avropa ölkələri ilə əlaqələrinin yaranmasının tarixi səbəbləri, Ağqoyunlu dövründə (XV əsrin ikinci yarısı) Avropa-Azərbaycan əlaqələri, Ağqoyunlu-Osmanlı münasibətləri və digər məsələlər əksini tapmışdır.
Kitabın sonunda verilmiş beş xəritə Azərbaycanın tarixi dövlətlərinin sərhədlərini göstərir. Uzun illərin araşdırmalarının nəticəsi olan həmin xəritələr Azərbaycanın tarixini saxtalaşdırmağa çalışanlara tutarlı cavabdır. Kitabda Azərbaycan tarixinə dair "Azərbaycan XV əsrdə", "Azərbaycan Qaraqoyunlu dövləti (1410-1468)", "Azərbaycan Ağqoyunlu dövləti (1468-1501)", "Azərbaycan Səfəvilər dövləti (I Şah İsmayılın hakimiyyəti dövrü, 1501-1524)" xəritələri yer almışdır.
Monoqrafiyada, həmçinin müxtəlif dövrlərdə itirilmiş torpaqlarımızı özündə əks etdirən Azərbaycan Respublikasının müasir xəritəsi də verilmişdir. Həmin xəritədə Ermənistan tərəfindən işğal olunmuş Dağlıq Qarabağ və onun ətrafındakı Azərbaycan əraziləri də göstərilmişdir.
Kitab dünyanın ingilisdilli tədqiqatçılarını və oxucularını XV əsr Azərbaycan tarixinin parlaq səhifələri ilə yaxından tanış edir.