Sentyabrın 15-də Biləsuvar şəhərində Azərbaycanın Milli Qəhrəmanı Mübariz İbrahimovun adını daşıyan liseydə "Bilik Günü"nə həsr olunmuş tədbir keçirilmişdir.
AzərTAc xəbər verir ki, tədbirdən əvvəl tədbir iştirakçıları ümummilli lider Heydər Əliyevin abidəsini ziyarət edərək xatirəsini ehtiramla anmışlar. Sonra Liseyin həyətində ucaldılmış Milli Qəhrəman Mübariz İbrahimovun abidəsi önünə gül dəstələri qoyulmuşdur.
Mərasimdə çıxış edən Mərkəzi Bankın idarə heyəti sədrinin birinci müavini Alim Quliyev Prezident İlham Əliyevin təhsilin inkişafına həmişə böyük önəm verdiyini vurğulayaraq regionlarda, o cümlədən Biləsuvarda məktəblərin maddi-texniki bazasının yüksəldiyini, yeni təhsil ocaqlarının istifadəyə verildiyini diqqətə çatdırmışdır.
A.Quliyev yeni dərs ilinin başlanması və Biləsuvar liseyinin ilk məzunlarının ali təhsil məktəblərinə qəbul zamanı yüksək nəticələr göstərməsi münasibətilə kollektivi təbrik etmiş, şagirdlərin bundan sonra da daha böyük nailiyyətlər qazanacaqlarına əminliyini bildirmişdir.
Tədbirdə iştirak edən Milli Məclisin deputatları Hadi Rəcəbli, Xanhüseyn Kazımlı, Fəzail İbrahimli, Biləsuvar Rayon İcra hakimiyyətinin başçısı Mahir Quliyev və başqaları liseyin şagirdlərini və pedaqoji kollektivini "Bilik Günü" münasibətilə təbrik etmiş, onlara yeni dərs ilində uğurlar arzulamışlar.
Tədbir "Bilik Günü" bayramına həsr olunmuş səhnəciklər, şerlər və mahnılardan ibarət bədii proqramla başa çatmışdır.