Dünən Azərbaycan Dövlət Neft Akademiyasında 15 sentyabr Bilik günü münasibətilə birinci kurs tələbələri ilə görüş keçirildi. Əvvəlcə akademiyanın müəllim və tələbə kollektivi Azərbaycan xalqının ümummilli lideri Heydər Əliyevin ali təhsil ocağındakı büstünü ziyarət etdi və abidənin önünə gül-çiçək dəstələri qoydu. 
Görüşdə çıxış edən ADNA rektoru, akademik Siyavuş Qarayev birinci kurs tələbələrini bu qocaman və dünya şöhrətli ali təhsil ocağına daxil olmaları münasibətilə təbrik etdi. Onun sözlərinə görə, bu il Azərbaycan Dövlət Neft Akademiyasına 1630 nəfər daxil olmuşdur. İyirmi birinci əsrin BMT tərəfindən "Təhsil əsri" elan edildiyini, yüksək intellekt, dərin təfəkkür, mənəvi zənginlik və informasiya texnologiyaları əsri olduğunu qeyd edən akademik ADNA-ya qəbul olunan tələbələrin düzgün seçim etdiklərini vurğuladı.
Onun sözlərinə görə, zəngin neft-qaz ölkəsi olan Azərbaycanın dünya dövlətlərinin strateji maraqlarının mərkəzində olması, ümummilli liderimiz Heydər Əliyevin işləyib hazırladığı və onun layiqli davamçısı, Prezident İlham Əliyevin uğurla həyata keçirdiyi neft strategiyasının əfsanədən reallığa çevrilməsi, Xəzərin neft-qaz ehtiyatlarının dünya bazarına nəql edilməsi ilə Azərbaycanın Avropanın ən zəngin və inkişaf etmiş ölkələrindən birinə çevrilməsi gənclərin seçiminin doğru olduğunu bir daha təsdiq edir. Eyni zamanda, Neft Akademiyasının qədim və şanlı tarixi ənənələri vardır və ümummilli liderimiz Heydər Əliyev də burada təhsil almışdır. Otuz ilə qədər keçmiş SSRİ-nin neft sənayesinə və Dövlət Plan Komitəsinə rəhbərlik etmiş həmyerlimiz Nikolay Baybakov, SSRİ qaz sənayesi naziri, Sosialist Əməyi Qəhrəmanı Sabit Orucov, Rusiyanın bir çox rayonlarında neft-qaz, qaz yataqlarını kəşf etmiş Sosialist Əməyi Qəhrəmanı Fərman Salmanov, Hindistan neftinin atası sayılan, üç dəfə SSRİ Dövlət Mükafatı laureatı Əyyub Tağıyev, kosmonavt Vitali Jolobov, Anqolanın prezidenti Duş Santuş, "LUKoyl" şirkətinin prezidenti Vahid Ələkbərov, Sosialist Əməyi Qəhrəmanı Kərim Kərimov və yüzlərlə digər görkəmli dövlət və ictimai xadim, alim məhz Neft Akademiyasında təhsil almışdır.
Akademik Siyavuş Qarayev bu il gənclərin çoxunun ADNA-ya yüksək ballarla qəbul olunduğunu qeyd edərək bildirdi ki, bu, onların neftçi peşəsinə marağından və intellektual səviyyələrindən irəli gəlir. Eyni zamanda, Azərbaycan dövləti son illərdə gənclərin inkişafına böyük qayğı göstərir. Prezident İlham Əliyevin imzaladığı "Azərbaycan gəncliyi Dövlət Proqramı" gənclərin hərtərəfli inkişafının sürətləndirilməsi və onların ictimai-siyasi fəallığının artırılması istiqamətində geniş imkanlar yaratmışdır. Bundan əlavə, dövlət başçısının şəxsi göstərişi ilə Neft Akademiyasının maddi-texniki bazası ildən-ilə möhkəmləndirilir, tələbələrin yüksək səviyyədə təhsil almaları üçün əlverişli şərait yaradılır. Rektor əmin olduğunu bildirdi ki, bu il ADNA-ya daxil olmuş tələbələr qarşıdakı təhsil illərində də yüksək əzmkarlıq göstərəcək, biliklərə dərindən yiyələnmək və peşəkar mühəndis kimi yetişmək üçün qətiyyətlə çalışacaq, müstəqil Azərbaycanın gələcəyi üçün layiqli kadrlar olacaqlar.
Sonra rektor Siyavuş Qarayev birinci kurs tələbələrinə tələbə vəsiqələrini və qiymət kitabçalarını təqdim etdi. Akademiyaya yüksək balla qəbul olunmuş tələbələr çıxış etdilər. Geoloji kəşfiyyat fakültəsinə 617 balla daxil olmuş birinci kurs tələbəsi Kamran Ağayev, qaz-neft mədən fakültəsinin birinci kursuna 662 balla qəbul olunmuş Gülay Məmiyeva, 412 balla kimya-texnologiya fakültəsinin tələbəsi adını qazanmış Firəngiz Dadaşova, 580 bal toplayaraq neft-mexanika fakültəsinə daxil olmuş Samir Musayev, istehsalat proseslərinin avtomatlaşdırılması fakültəsinə 612 balla qəbul olunmuş Kamal Ağayev, iqtisadiyyat, beynəlxalq iqtisadi münasibətlər və menecment fakültəsinin tələbəsi Teyla Yaqubova, energetika fakültəsinin tələbəsi Vüqar Mirzəyev çıxış edərək bu il tələbə adını qazanmış bütün gəncləri təbrik etdilər, ADNA kimi nüfuzlu bir ali təhsil ocağının tələbəsi olmaqdan qürur duyduqlarını bildirdilər. Qeyd olundu ki, ulu öndər Heydər Əliyevin neft strategiyası Azərbaycan xalqının rifahının yaxşılaşmasında mühüm rol oynamış, ölkənin dinamik inkişafını təmin etmişdir. Özləri də gələcəkdə ixtisaslı mühəndis kimi yetişərək Azərbaycanın çiçəklənməsinə töhfələrini vermək niyyətindədirlər.
Birinci kurs tələbəsi Nərgiz Şirinzadənin atası, ADNA-nın məzunu, Milli Aerokosmik Agentliyin baş direktoru Alçın Şirinzadə və ADNA-nın məzunu, Bakı İqtisad Kollecinin müəllimi Gülnarə Alyarova tələbələri Bilik günü münasibətilə təbrik etdilər, akademiyanın rəhbərliyinə və müəllim kollektivinə ölkəmiz üçün peşəkar kadrlar hazırlanması işində uğurlar arzuladılar.

Paşa ƏMİRCANOV, "Xalq qəzeti"