Binəqədi rayonu, Binəqədi qəsəbəsindəki 182 nömrəli orta məktəbdə Bilik Günü və yeni dərs ilinin başlanması münasibətilə tədbir keçirilmişdir.
Tədbiri giriş sözü ilə açan məktəbin direktoru Zinyət Tağıyeva bildirdi ki, ümummilli lider Heydər Əliyev tərəfindən əsası qoyulmuş təhsil strategiyası bu gün Prezident İlham Əliyevin rəhbərliyi ilə uğurla davam etdirilir. Təhsil müəssisələrində çalışan işçilərin əmək haqlarının və tələbələrin təqaüdlərinin artırılması haqqında Azərbaycan Prezidentinin sərəncamları, Bakıətrafı qəsəbələrin sosial-iqtisadi inkişafı ilə bağlı Dövlət Proqramı və Heydər Əliyev Fondunun prezidenti, millət vəkili Mehriban xanım Əliyevanın "Yeniləşən Azərbaycana yeni məktəb Proqramı" və s. qarşıya qoyulan vəzifələrin icrasına, tədris müəssisələrinin maddi-texniki bazasının möhkəmlənməsinə yönəldilmişdir.
Tədbirdə vurğulanmışdır ki, dövlət başçısının 28 iyun 2011-ci il tarixli Sərəncamı ilə məktəbin biologiya müəllimi Fəridə Cəfərova "Ən yaxşı müəllim" müsabiqəsində uğur qazanaraq 5000 (beş min manat) məbləğində pul mükafatı ilə təltif olunmuşdur. Azərbaycan dili və ədəbiyyatı müəllimi Bahadır Cəlilov "Əməkdar müəllim" fəxri adına layiq görülmüşdür. Təhsil Nazirliyinin keçirdiyi fənn olimpiadasında 9-cu sinif şagirdi Aytən Axundova 2-ci yeri tutmuşdur. Bakı Şəhəri üzrə Təhsil İdarəsinin təşkil etdiyi "İlin ən yaxşı fənn kabinetləri" müsabiqəsində sözügedən tədris müəssisəsinin Azərbaycan dili və riyaziyyat kabinetləri qalib elan olunmuşdur. Məktəbin 5-ci sinif şagirdləri Tacəddin və Nəcməddin Hacıyevlər isə akrobatika gimnastikası üzrə ustalığa namizəd olmuşlar.
Tədbirdə həmçinin xatırladılmışdır ki, bu il 182 nömrəli məktəbi 89 nəfər bitirmiş, 38 şagird ali təhsil müəssisələrinə qəbul olunmuşdur. Məzunlardan Gülşən Haqverdiyeva 677 bal, Xəqani Hüseynov 603 bal toplamışlar.
Sonda 600-dən yuxarı bal toplayan tələbələr və "Ən yaxşı müəllim" müsabiqəsinin qalibi, "Əməkdar müəllim" adı ilə təltif olunan müəllimlər, qalib idmançılar qiymətli hədiyyələrlə mükafatlandırılmışlar.

Vaqif BAYRAMOV, "Xalq qəzeti"