Sentyabrın 15-də Bakı Slavyan Universitetinin (BSU) ikinci tədris korpusunun əsaslı təmirdən sonra açılış mərasimi olmuşdur. 
BSU-nun mətbuat xidmətindən AzərTAc-a verilən məlumata görə, tədbiri giriş sözü ilə açan rektor, AMEA-nın müxbir üzvü, professor Kamal Abdullayev qonaqları və tələbələri salamlamış və onları yeni dərs ilinin başlanması münasibətilə təbrik etmişdir. Rektor tələbələrə müraciətində bildirmişdir: "Bu universitet sizə təkcə qapılarını deyil, ürəyini də açır". Xüsusi vurğulanmışdır ki, universitetin əsaslı təmiri dövlətimizin başçısı İlham Əliyevin təhsilə qayğısının nəticəsidir.
Tədbirdə çıxış edən Nəsimi Rayon İcra Hakimiyyətinin başçısı Nəsib Məhəməliyev ikinci tədris binasının təmirini yüksək qiymətləndirmiş, mərasimdə iştirak edən tələbələri "Bilik Günü" münasibətilə təbrik etmiş və onlara yeni dərs ilində uğurlar arzulamışdır. Tələbələr onlar üçün yaradılan şəraitə görə universitet rəhbərliyinə təşəkkür etmişlər.
Sonra qonaqlar və tələbələr ümummilli lider Heydər Əliyevin büstü önünə əklil və çiçək dəstələri düzmüş, universitetin yeniləşmiş tədris binası ilə tanış olmuşlar. Burada yeni açılmış Həsən bəy Zərdabi və professor Məmməd Tağıyev adına auditoriyalar, kitabxana və qiraət zalı, tələbə klubu, fotolaboratoriya-muzey və müasir standartlara cavab verən geniş tədris otaqları tələbələrin ixtiyarına verilmişdir.