Sentyabrın 5-də Qusar Mərkəzi Mədəniyyət Sarayında təhsil işçilərinin konfransı keçirilmişdir. AzərTAc xəbər verir ki, konfransda təhsil naziri Misir Mərdanov, Milli Məclisin deputatı Azər Badamov, rayon icra hakimiyyətinin nümayəndələri, rayonun təhsil işçiləri iştirak etmişlər.
Konfransda rayon üzrə "2011/2012-ci dərs ilinin yekunları və yeni dərs ilində qarşıda duran vəzifələr" mövzusunda məruzə dinlənilmişdir. Bildirilmişdir ki, respublikada təhsilin inkişafı istiqamətində uğurlu layihələr həyata keçirilir, məktəblərin maddi-texniki bazası möhkəmləndirilir. Son illər rayonda 35 yeni məktəb binasının inşa olunduğunun vurğulandığı məruzədə bu istiqamətdə tədbirlərin sürətlə davam etməsi sayəsində rayon şagirdlərinin 82 faizinin normal şəraitdə təhsil almalarının təmin olunduğu diqqətə çatdırılmışdır.
Konfransda çıxış edən təhsil naziri Misir Mərdanov qeyd etmişdir ki, təhsilin ayrı-ayrı sahələri üzrə 16 inkişafyönümlü Dövlət Proqramının təsdiq olunması Prezident İlham Əliyevin Azərbaycan təhsilinin inkişaf modelinin formalaşmasına diqqətin nəticəsidir. Nazir ucqar dağ kəndlərinə ixtisaslı kadrların cəlb olunması, azşagirdli məktəblərdə təhsilin keyfiyyəti məsələlərinə toxunmuş, təhsilin icbariliyi məsələsinə məsuliyyətlə yanaşılmasını tövsiyə etmişdir.
Tədbirdə qəbul imtahanlarında yüksək nəticə göstərmiş məzunlara hədiyyələr təqdim olunmuşdur.