Avqustun 10-da Bakı Dövlət Universitetinin (BDU) rektoru, Milli Məclisin deputatı, akademik Abel Məhərrəmov Koreyanın Azərbaycandakı səfiri Li Ci-Han ilə görüşmüşdür.
Bakı Dövlət Universitetinin mətbuat və informasiya şöbəsindən bildirmişlər ki, görüşdə akademik A.Məhərrəmov BDU-nun fəaliyyəti, beynəlxalq əlaqələri, proqram və qrant layihələrində iştirakı barədə danışmışdır.
Azərbaycan-Koreya əlaqələrinin əhəmiyyətini vurğulayan rektor 2007-ci ildən universitetdə Koreya dili və ədəbiyyatı ixtisasının tədris olunduğunu diqqətə çatdırmışdır. Həmin ixtisasda 38 tələbənin təhsil aldığını xatırladan akademik A.Məhərrəmov onlardan 8 nəfərinin bu il məzun olduğunu söyləmişdir. O qeyd etmişdir ki, məzunlardan 3-ü Koreya universitetlərinin magistratura şöbələrinə daxil olmuşdur.
Təhsil sahəsində əməkdaşlıq barədə danışan səfir Li Ci- Han bildirmişdir ki, Azərbaycanda 26 koreyalı, öz ölkəsində isə 76 azərbaycanlı gənc təhsil alır.
Sonra qonaq Bakı Dövlət Universitetinin tədris şəraiti ilə tanış olmuşdur.

AzərTAc