Avqustun 7-də Naxçıvan Muxtar Respublikası Ali Məclisinin sədri Vasif Talıbov Ərtoğrol Cavid adına Uşaq Musiqi və Bədii Sənətkarlıq Məktəbi üçün inşa olunan binada tikinti işlərinin gedişi ilə tanış olmuşdur.
Məlumat verilmişdir ki, binada hörgü və beton işləri başa çatdırılmış, kommunikasiya xətləri çəkilmişdir. Hazırda suvaq işləri görülür, dam örtüyü vurulur. İki mərtəbədən ibarət binada 23 sinif otağı, tədbirlər zalı və yardımçı otaqlar istifadəyə veriləcək, kitabxana yaradılacaqdır. Müasir tələblər səviyyəsində inşa olunan 330 yerlik bina növbəti tədris ilində istifadəyə veriləcəkdir.
Ali Məclisin sədri obyektin layihəsinə baxmış, tikinti işlərinin gedişi ilə bağlı müvafiq tapşırıqlar vermişdir.
* * *
Həmin gün Ali Məclisin sədri Naxçıvan şəhərindəki XII-XIV əsrlərə aid "Buzxana" memarlıq abidəsində həyata keçirilməsi nəzərdə tutulan təmir-bərpa işlərinin layihəsinə baxmışdır. Bildirilmişdir ki, təmir-bərpa işlərindən sonra burada lazımi şərait yaradılacaq, Azərbaycan, o cümlədən Naxçıvan mətbəxinin ləziz nümunələri təqdim ediləcəkdir.
Ali Məclisin sədri layihənin icrası ilə bağlı müvafiq tapşırıqlar vermişdir.