Bu günlərdə AMEA İqtisadiyyat İnstitutu onun direktoru, iqtisad elmləri doktoru, professor İsa Alıyevin timsalında daha bir uğura imza atmışdır. Belə ki, o, tanınmış elm xadimi və uğurlu alim karyerası, məhsuldar peşə və ictimai fəaliyyətinə, həmçinin dünya intelektual elitasının sırasında yüksək fəxri yer tutduğuna görə, Beynəlxalq Sokrat Komitəsi tərəfindən təsis edilmiş "ELMDƏ AD" (THE NAME of SCİENCE) fəxri mükafatına layiq görülmüşdür. 
Eyni zamanda, İsa Alıyevin rəhbərlik etdiyi AMEA İqtisadiyyat İnstitutu kollektivinin peşəkar, elmi-tədqiqat və mədəni maarifləndirici fəaliyyəti də "European Quality Award" beynəlxalq mükafatı ilə qiymətləndirilmişdir.
Bu münasibətlə 2012-ci ilin 10-13 iyulunda İrlandiyanın paytaxtı Dublin şəhərində beynəlxalq tədbir keşirilmişdir. Mərasim Avropa Açıq Elmi Forumu, Avropa Biznes Assambleyası və Avropa Rektorlar Klubu, eyni zamanda, dünyanın 16 ölkəsinin peşəkar, elmi və yaradıcılıq ittifaqlarının nümayəndələrinin iştirakı ilə həyata keçirilmişdir. Forumun təşkilat komitəsinə Nobel mükafatı laureatı Harıld Kroto başçılıq etmişdir. Beynəlxalq tədbiri Dublin şəhərinin meri lord Naoisae Muiri açaraq, onun getdikcə artan və güclənən mövqeyi haqqında məlumat vermişdir. Avropa və dünyanın tanınmış simalarının qatıldığı tədbirin sonunda qaliblərə mükafatlar verilmişdir. Mükafatçılar sırasında iqtisad elmləri doktoru professor İsa Alıyev də olmuşdur. O, "ELMDƏ AD" fəxri titulunun sahibi olmaqla, müvafiq diplom və mavi lentdə "Dünya elminə nailiyyətlər üçün" nişanı ilə təltif olunmuşdur. Bu mükafat nəinki AMEA İqtisadiyyat İnstitutuna, bütövlükdə Azərbaycan elminə verilən yüksək qiymətdir.

"Xalq qəzeti"