Sumqayıt Şəhər İcra Hakimiyyətinin təşəbbüsü, Gənclər və İdman Baş İdarəsinin təşkilatçılığı ilə müxtəlif sahələri təmsil edən gənclərin vətənpərvərlik ruhunda tərbiyə işinin gücləndirilməsi, sağlam həyat tərzinin təbliğ edilməsi və asudə vaxtın səmərəli təşkil edilməsi məqsədilə "Gənclik şəhərinin sağlam gəncliyi olmalıdır!" devizi altında "Yay məktəbi"nə start verilmişdir. İstedadlı, yaradıcı və ictimai fəal gənclərdən ibarət olan ilk heyət Quba rayonuna ekskursiyaya yollanmışdır.
Ümumiyyətlə, bu cür səfərlərin iyul və avqust aylarında 300 nəfərə yaxın gəncin iştirakı ilə hər həftə təşkili nəzərdə tutulmuşdur. Ekskursiyalar ümumilli lider Heydər Əliyevin abidəsi qarşısından start götürür və burada da bitir.
Ekskursiyalar zamanı xüsusi geyimlərdə olan gənclər Quba rayonunda Heydər Əliyev Mərkəzini, "Soyqırımı məzarlığı"nı ziyarət edirlər. Gənclər debat, diskussiya və əyləncəli idman yarışlarına qatılırlar. Onlar həmçinin Quba rayonunun əsrarəngiz təbiəti ilə tanış olurlar.
Ümumiyyətlə, son üç ildə Gənclər və İdman Baş İdarəsi tərəfindən "Yay məktəbi"nə altı mindən çox yeniyetmə və gənc cəlb edilmişdir.

Əli NƏCƏFXANLI, "Xalq qəzeti"