İyulun 4-də Azərbaycan Milli Elmlər Akademiyasının Nəsimi adına Dilçilik İnstitutunda görkəmli Azərbaycan yazıçısı, şair, dramaturq, publisist və ictimai xadim Məmməd Səid Ordubadinin anadan olmasının 140 illiyinə həsr edilmiş konfrans keçirilmişdir.

AMEA-dan bildirmişlər ki, institutun direktoru filologiya elmləri doktoru, professor Fəxrəddin Veysəlli M.S.Ordubadinin Azərbaycanın ictimai fikir tarixindəki yeri və rolundan danışmışdır. Yazıçının qələmə aldığı əsərlərin bütün dövrlərdə öz dəyərini qoruduğu və maraqla oxunduğu diqqətə çatdırılmışdır.

Sonra Bakı Slavyan Universitetinin dosenti Dürdanə Əliyevanın M.S.Ordubadinin dili və üslubuna dair məruzəsi dinlənilmişdir.

Konfransda Nəsimi adına Dilçilik İnstitutunun əməkdaşı Rübabə Əliyeva görkəmli ədibin əsərlərindəki xüsusi adlara, professor İsmayıl Kazımov isə M.S.Ordubadinin "Gizli Bakı" əsərinin leksikasına həsr olunmuş məruzələrlə çıxış etmişlər.

Professorlar Qəzənfər Kazımov, Qara Məşədiyev, Roza Eyvazova və başqaları tədbirdə çıxış edərək M.S.Ordubadinin yaradıcılığında dil məsələləri ilə bağlı fikirlərini bölüşmüşlər.