İyunun 28-də Heydər Əliyev adına İdman-Konsert Kompleksində 2011-2012-ci tədris ili məzunlarının təntənəli buraxılış gecəsi keçirilmişdir. 
Bakı Şəhəri üzrə Təhsil İdarəsinin (BŞTİ) təşkilatçılığı və "Bakcell" şirkətinin dəstəyi ilə reallaşdırılan tədbirdə paytaxt məktəblərinin builki məzunları ilə yanaşı, təhsil işçiləri və ictimaiyyətin nümayəndələri də iştirak etmişlər.
Tədbirdə Bakı Şəhəri üzrə Təhsil İdarəsinin müdiri Nailə Rzaquliyeva Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın məzunlara təbrik məktubunun mətnini oxumuşdur.
BŞTİ-nin müdiri ümummilli lider Heydər Əliyevin təhsilə daim böyük əhəmiyyət verdiyini, ulu öndərin ideyalarının Azərbaycan Prezidenti İlham Əliyev tərəfindən uğurla həyata keçirildiyini vurğulamışdır.
N.Rzaquliyeva Heydər Əliyev Fondunun prezidenti Mehriban xanım Əliyevanın təhsilimizə göstərdiyi böyük diqqət və qayğını xatırlatmışdır.
Təhsilimizin inkişaf etdiyini bildirən N.Rzaquliyeva Bakının ümumtəhsil məktəblərini bitirən məzunların bu sahədə qazandıqları nailiyyətlərdən danışmışdır.
Ölkəmizdə təhsil sahəsinə böyük önəm verildiyini qeyd edən təhsil naziri Misir Mərdanov Azərbaycan Prezidenti İlham Əliyevin bu sahə ilə bağlı imzaladığı sənədlərin əhəmiyyətini diqqətə çatdırmışdır.
Nazir məzunları təbrik etmiş, onları doğma Vətənə və xalqa ləyaqətlə xidmətə çağırmışdır.
Bildirilmişdir ki, tədris ilində Bakının ümumtəhsil müəssisələrini 23 minədək gənc bitirir.
Təhsildə uğur qazanan məzunlara hədiyyələr təqdim olunmuşdur.