Türkiyənin Hitit Universiteti adını Anadolu torpaqlarının minillik tarixindən almışdır. Zəngin tarixə malik Hititin adını şərəflə daşıyan Universitetin rektoru, professor Dr. Reha Metin Alkan Azərbaycan Turizm İnstitutuna gəlmişdir.
İnstitutun rektoru, tarix elmləri doktoru, professor Cəfər Cəfərov Hitit Universitetinin rektoru, professor Dr. Reha Metin Alkanı və onu müşayiət edən şəxsləri səmimi salamladıqdan sonra qonaqlara ATİ-nin yaranma tarixindən söz açmışdır. Ali təhsil ocağının üçüncü məzun ili ərəfəsində olduğunu, beynəlxalq təşkilatlar və nüfuzlu ali təhsil ocaqları ilə faydalı əməkdaşlığından danışmışdır. Qonaq öz növbəsində bildirmişdir ki, 2006-cı ildən müstəqil ali təhsil ocağı kimi fəaliyyət göstərən Hitit Universiteti altı il əvvələ kimi Çorum Qazi Universitetində 6 fakültə, 4 magistratura pilləsi, 7 min nəfər tələbə ilə təmsil olunmuşdur. Az bir müddət ərzində isə Türkiyənin nüfuzlu ali təhsil ocağı imicini qazanmışdır. Bir sıra beynəlxalq, o cümlədən Leonardo da Vinçi, Erasmus Mundus proqramlarının fəal iştirakçısıdır.
2007-ci ildən 2011-ci ilə kimi olan dövrdə Hitit Universitetinin 66 tələbəsi qeydiyyatdan keçmişdir və proqram çərçivəsində Avropanın nüfuzlu universitetlərində təhsil almaq şansı qazanmışdır. Azərbaycana səfərdə məqsəd qardaş ölkənin ali təhsil ocaqları ilə yaxından tanışlıq, universitetlərarası memorandum və sazişlərə imza atmaq, bir sözlə, əməkdaşlıq əlaqələrini genişləndirməkdir. Hitit Universitetinin rektoru qeyd etmişdir ki, Bakıda olduqları müddətdə Azərbaycanın tanınmış ali təhsil ocaqları ilə ikitərəfli sənədlərə imza atmışlar. Eyni zamanda, onlar Azərbaycan Turizm İnstitutu ilə də davamlı ikitərəfli əməkdaşlıqda maraqlıdırlar. ATİ-nin rektoru C.Cəfərov bu faydalı təklifə razılığını bildirmişdir. Bu görüşdən sonra Azərbaycan Turizm İnstitutunun əməkdaşlıq edəcəyi universitetlərin sırasına Türkiyənin Hitit Universitetinin adı da yazılmışdır.

Z. BƏŞİRQIZI, "Xalq qəzeti"