Azərbaycan Turizm İnstitutunun Beynəlxalq əlaqələr şöbəsinin müdiri Şəhla Əhmədova bu günlərdə İsveçrənin Lozanna şəhərində Dünya Turizm Təşkilatı (DTT) və Lozanna Hotelçilik Məktəbinin (EHL) birgə təşkil etdiyi İpək Yolu Strateji Təşəbbüs proqramı çərçivəsində keçirilən tədbirdə iştirak etmişdir. Qeyd etmək yerinə düşər ki, institut əməkdaşlarının beynəlxalq tədbirlərdə iştirakı və layiqli nəticələr əldə etmələri son vaxtlar ənənəvi hal almışdır.
İnstitutun mətbuat xidmətindən bidirmişlər ki, tədbirin gündəliyinə uyğun olaraq Lozanna Hotelçilik Məktəbinin tələbələri proqramda iştirak edən ölkələrin İpək Yolu üzrə turizm imkanlarını araşdırmış və əldə etdikləri nəticələrə uyğun strateji turizm planlarını hazırlamışlar. Azərbaycanla yanaşı, Albaniya, Türkiyə, Rusiya, Çin, Yunanıstan, İran, Koreya Respublikası, Ukrayna və Ermənistan haqqında hazırlanmış hesabatlar ölkə nümayəndələrinin iştirakı ilə dinlənilmiş və daha uğurlu qrup bütün nümayəndə heyəti qarşısında öz hesabatlarını təqdim etmək şansı qazanmışdır. Daha sonra adıçəkilən ölkə nümayəndələri ilə yanaşı, Dünya Turizm Təşkilatının İpək Yolu Proqramının direktoru Alla Peressolova və əməkdaşı Cohanna Devine, Lozanna Hotelçilik məktəbinin professor-müəllim heyəti və tələbələrin iştirakı ilə hər ölkənin qalib komandaları öz təqdimatlarını keçirmişlər. Yekunda DTT və ölkə nümayəndələrinin yekdil qərarı ilə Azərbaycanı təmsil edən qrupun təqdimatı birinci yerə layiq görülmüşdür. İpək Yolu Proqramının direktoru Alla Peressolova onu da bildirmişdir ki, qaliblər birinci yeri tutmaqla bərabər, mükafat olaraq Rusiya Federasiyasının Altay vilayətinə səfər etmək şansı da qazanmışlar.

Z. BƏŞİRQIZI, "Xalq qəzeti"