İyunun 12-də Azərbaycan Mərkəzi Bankı və Azərbaycan Təhsil Nazirliyi, UNİCEF-in Azərbaycan nümayəndəliyinin birgə təşkilatçılığı ilə "Uşaqlar üçün maliyyə təhsili və maliyyə savadlılığı: Gələcək naminə bərabər imkanlar" mövzusunda milli konfrans keçirilmişdir.
Tədbirdə müxtəlif dövlət qurumları, yerli və beynəlxalq təşkilatlar, bank və digər maliyyə institutlarının nümayəndələri iştirak etmişlər.
Mərkəzi Bankın nümayəndəsi Asif Cahangirov bildirmişdir ki, tədbirin məqsədi uşaqlara erkən yaşda maliyyə bacarıqlarını aşılamaq, onların bu sahədə maarifləndirilməsinə təkan verməkdir.
Tədbirdə vurğulanmışdır ki, son dövrlərdə dünyada əhalinin maliyyə savadlılığının aşağı olması ilə bağlı narahatlıqlar getdikcə artmaqdadır. Dünyada davam etməkdə olan böhran şəraitində ictimaiyyət tərəfindən maliyyə savadlılığı əsas həyat bacarıqlarından biri kimi dəyərləndirilir. Artıq müasir dövr uşaq yaşlarından bu sahədə müəyyən biliklərin öyrənilməsini tələb edir. Ölkədə maliyyə savadlılığının artırılması istiqamətdə Azərbaycanda bir sıra iri layihələr həyata keçirilir.
Konfransda uşaqlara maliyyə biliklərinin hansı vasitələrlə aşılanması, onların maarifləndirilməsində valideynlərin və cəmiyyətin rolu kimi məsələlər müzakirə olunmuşdur.

AzərTAc