İyunun 12-də Azərbaycan Respublikasının Prezidenti yanında Dövlət İdarəçilik Akademiyasında (DİA) "Azərbaycan-UNESCO əlaqələrinin 20 illiyi" mövzusunda tədbir keçirilmişdir.
Tədbir iştirakçıları əvvəlcə Heydər Əliyev Fondunun vitse-prezidenti Leyla xanım Əliyevanın təşəbbüsü ilə yaradılmış IDEA (International Dialogue for Environmental Action) Ətraf Mühit Kampaniyası çərçivəsində akademiyada fəaliyyət göstərən resurs mərkəzi ilə tanış olmuşlar.
DİA-nın rektoru, akademik Urxan Ələkbərov tədbiri açaraq vurğulamışdır ki, UNESCO-nun ali məqsədi dünya ölkələri arasında təhsil, elm və mədəniyyət sahələrində körpü salmaq, bu vasitə ilə sülhün və təhlükəsizliyin möhkəmlənməsinə dəstək olmaqdır. Azərbaycan-UNESCO əlaqələrinin inkişafına toxunan rektor bildirmişdir ki, münasibətlərimizin yaranmasında ümummilli lider Heydər Əliyevin əvəzsiz xidmətləri olmuşdur. Ulu öndər 1993-cü ildə Fransaya səfəri zamanı qurumun baş direktoru ilə görüşmüş və münasibətlərimizin genişləndirilməsi istiqamətində müzakirələr aparmışdır.
Vurğulanmışdır ki, Prezident İlham Əliyev də Azərbaycan ilə bir sıra beynəlxalq təşkilatlar, o cümlədən UNESCO arasında əlaqələrin inkişaf etdirilməsinə böyük diqqət göstərir.
U.Ələkbərov qeyd etmişdir ki, Azərbaycanın birinci xanımı Mehriban Əliyevanın xidmətləri sayəsində UNESCO ilə əlaqələr ən yüksək inkişaf səviyyəsinə çatmışdır.
UNESCO üzrə Azərbaycan Milli Komissiyasının birinci katibi Günay Əfəndiyeva isə bildirmişdir ki, təməli 20 il əvvəl qoyulmuş əməkdaşlığımız hazırda dinamik inkişaf edir. Bu gün ümummilli lider Heydər Əliyevin ideyalarının həyata keçirilməsində Prezident İlham Əliyev ilə birgə Azərbaycanın birinci xanımı Mehriban Əliyeva da yaxından iştirak edir. Dövlətimizin başçısının rəhbərliyi ilə həyata keçirilən layihələr nəticəsində Azərbaycan artıq UNESCO-nun bir sıra tədbirinə ev sahibliyi etmişdir. Bu cür tədbirlərin ölkəmizdə keçirilməsi Azərbaycan həqiqətlərinin dünyada yayılmasına xidmət edir. Təsadüfi deyildir ki, Mehriban xanım Əliyeva milli musiqinin, ədəbiyyat və poeziyanın inkişafına verdiyi töhfələrə, dünya mədəniyyətlərinin mübadiləsi sahəsindəki xidmətlərinə, UNESCO-nun ideyalarına sadiqliyinə görə qurumun xoşməramlı səfiri adına layiq görülmüşdür.
Sonra DİA-nın UNESCO Mərkəzinin müdiri Cahangir Hacıyevin rəhbərlik etdiyi qurumun fəaliyyətinin 15 illiyi ilə bağlı hesabat məruzəsi dinlənilmişdir.
Təhsil naziri Misir Mərdanov, ekologiya və təbii sərvətlər nazirinin müavini Novruz Quliyev və AMEA-nın Rəyasət Heyətinin üzvü, akademik Akif Hacıyev çıxış edərək bildirmişlər ki, son illər UNESCO bütün dünyada fəaliyyətini daha da genişləndirmiş və yeni istiqamətlərdə tədbirlər həyata keçirməyə başlamışdır. Qurum ilə əlaqələrə toxunan natiqlər vurğulamışlar ki, Azərbaycanın nüfuzlu beynəlxalq təşkilatlar ilə əməkdaşlığı, o cümlədən UNESCO ilə münasibətləri respublikamızın beynəlxalq müstəvidəki nüfuzunu daha da artırmışdır.
Tədbirdə, həmçinin UNESCO üzrə Azərbaycan Respublikası Milli Komissiyası tərəfindən hazırlanmış "İnsan və biosfer" illik nəşrinin təqdimatı olmuşdur.
Bildirilmişdir ki, Azərbaycan, rus və ingilis dillərində hazırlanmış nəşrdə dünyada ən aktual mövzularla bağlı elmi məqalələr yer almışdır.