İyun ayının 12-də Bakıda Azərbaycan Milli Elmlər Akademiyası, respublika Təhsil Nazirliyi, Rusiya Federasiyasının Elmlər Akademiyası və Rusiya Təhsil və Elm Nazirliyinin təşkilatçılığı ilə "Böyük dərinliklərin karbohidrogen potensialı: gələcəyin enerji resursları-reallıq və proqnoz" mövzusunda beynəlxalq elmi konfrans keçiriləcəkdir.
SOCAR, bp və GAZPROM şirkətlərinin sponsorluğu ilə keçiriləcək konfransda "Karbohidrogen resurslarının qiymətləndirilməsi və Cənubi Xəzərin neft-qazlılığının perspektivliyi", "Böyük dərinliklərin karbohidrogenləri: axtarış metodlarının təkmilləşmə yolları", "Yerin qlobal enerji mənbələri və nəhəng neft-qaz yataqlarının formalaşma mexanizmi", "Dərinliyə gömülmüş neft-qazlılıq rezervuarlarının təbiəti" və s. mövzularda məruzələr dinləniləcəkdir.
Konfrans zamanı metodik vasitələrin, neft ixtisası üzrə təhsil alan tələbələr üçün hazırlanan dərsliklərin və böyük dərinlikdə karbohidrogen potensialı problemlərinə həsr olunmuş monoqrafiyaların sərgisi təşkil olunacaqdır.

"Xalq qəzeti"