Azərbaycan Müəllimlər İnstitutu Ağcabədi filialında Milli Məclisin deputatı, siyasi elmlər doktoru, professor Aqiyə Naxçıvanlının ulu öndər Heydər Əliyev barədə "Şəxsiyyətin qüdrəti" kitabının müzakirəsi keçirildi. 
Tədbiri giriş sözü ilə açan filialın direktoru, professor Xaqani Məmmədov bildirdi ki, ulu öndərin anadan olmasının 89-cu ildönümü ərəfəsində işıq üzü görən və Heydər Əliyevin ictimai-siyasi fəaliyyətini işıqlandıran silsilə məqalələr, elmi əsərlər içərisində "Şəxsiyyətin qüdrəti" kitabı dolğunluğu, mövzusunun aktuallığı ilə diqqəti cəlb edir.
"Heydər Əliyev sosial-iqtisadi inkişaf strategiyasının banisidir" mövzusunda məruzə edən kafedra müdiri Tahir Kərimli kitabın ictimai-siyasi əhəmiyyətindən danışdı və bildirdi ki, Heydər Əliyev haqqında nə qədər yazılsa da, onun fenomen şəxsiyyətinin, ictimai-siyasi fəaliyyətinin hələ açılmayan səhifələrini tədqiq etməyə böyük ehtiyac vardır. "Heydər Əliyev və azərbaycançılıq ideologiyası" mövzusunda məruzə edən baş müəllim Mahir Səlimov bildirdi ki, "Şəxsiyyətin qüdrəti" kitabında Heydər Əliyevin bilavasitə azərbaycançılıq ideologiyasının formalaşmasında xidmətləri haqqında müfəssəl məlumat verilir. Bu ideologiya Azərbaycan xalqını vahid bir məfkurə ətrafında birləşdirdi.
"Azərbaycan dilinin inkişafında Heydər Əliyev dühasının rolu" mövzusunda məruzə edən kafedra müdiri Əli Əliyev isə bildirdi ki, bu kitab Azərbaycan xalqını dünya arenasında tanıdan, fenomen şəxsiyyət, əvəzsiz siyasi xadim Heydər Əliyev və onun çoxşaxəli ictimai-siyasi fəaliyyəti haqqında yazılmış ən sanballı əsərlərdən biridir. Kitabda ana dilimizin saflığı uğrunda mübarizə aparan ulu öndərimizin xidmətləri layiqincə qiymətləndirilir.
Məruzələr ətrafında çıxışlarda yazıçı-publisist Ziyəddin Sultanov, YAP Ağcabədi rayon təşkilatının sədr müavini Nazim Bünyadov, filialın dosenti Məhəmməd Hüseynov kitabın böyük mənəvi-siyasi əhəmiyyətindən bəhs etdilər. Bildirildi ki, "Şəxsiyyətin qüdrəti" kitabında ulu öndərimizin çoxcəhətli fəaliyyəti ayrı-ayrılıqda təhlil olunmuşdur.
Sonda filialın direktoru X.Məmmədov "Şəxsiyyətin qüdrəti" kitabının işıq üzü görməsində böyük əməyi olan professor A. Naxçıvanlıya yeni yaradıcılıq uğurları arzuladı.

T.RÜSTƏMOV, "Xalq qəzeti"