Bu günlərdə Azərbaycan Turizm İnstitutunda əsası 1957-ci ildə ABŞ-da qoyulan, Bakıda ilk beynəlxalq mehmanxanalar şəbəkəsi sayılan "Hyatt Regency Baku"nun məsul şəxsləri ilə institutun turizm və otelçilik, menecment ixtisasları üzrə təhsil alan tələbələrinin görüşü olmuşdur. 
Təqdimat və sual-cavab formatındakı tədbirdə Hyatt otelin təmsilçilərindən Səbinə Hüseynova, Fərman Mehdizadə, Fadi Akeel, Yevgeniy Nahman otelçilik və menecmentliklə əlaqədar tələbələri maraqlandıran çoxsaylı sualları cavablandırmışlar. Fadi Akeel görüş iştirakçılarına Hyatt oteldə insanlara yalnız müştəri xidmətləri göstərməyin xüsusiyyətləri haqqında məlumatları deyil, eyni zamanda, başqa turizm xidmətləri, xüsusilə hədəf bilinən qonaqpərvərliyin detallarını şərh etmişdir. O, öz ölkəsi olan İordaniyanın timsalında turizmin inkişafına təkan verən amillər sırasında bu cür yanaşmanın müstəsna rol oynadığını xüsusi vurğulamışdır. Turizmin gəzmək, əylənmək, sadəcə görmək prizmasından deyil, sivilizasiyaların qarşılıqlı inkişaf göstəricisinin başlıca və vacib amili olması baxımından da gərəkli olduğunu bildirmişdir. Fadi Akeel turistlərə göstərilən qonaqpərvərliyin yeraltı təbii sərvətlərdən məhrum olan ölkələrin iqtisadi inkişafında, maliyyə resurslarının formalaşmasında və möhkəmlənməsində xüsusi əhəmiyyətindən danışmışdır.
Otelin digər nümayəndəsi Fərman Mehdizadə Hyatt oteldəki fəaliyyətində yalnız işləmək yox, öyrənmək, təcrübə qazanmaq tendensiyasının üstünlüklərini şərh etmişdir. Səbinə Hüseynova isə ATİ tələbələrinə maraqlı təkliflər etmişdir. O, gələcəyin otelçilərinə və turizm menecmentlərinə yay dövründə 3 aylıq iş, eyni zamanda, Hyatt otelin Harvard Biznes Məktəbi ilə əməkdaşlığı çərçivəsində həyata keçirdiyi liderlik və menecment kurslarından yararlanmağı məsləhət görmüşdür. Ardıcıl olaraq təşkil edilən təlim və inkişaf proqramlarının ATİ tələbələri üçün faydalı olacağına inandığını bildirmişdir.
Çox güman ki, bu cür tədbirlər turizm sahəsində çalışmağa hazırlaşanların doğru zaman, yer və vaxtda hər şeyə hazır olmaları üçün daha ciddi fəaliyyətə başlamalarında və hərtərəfli biliyə malik olmalarında təkan rolu oynayacaq.

Z. BƏŞİRQIZI, "Xalq qəzeti"