Mayın 18-də "Park Bulvar"ın "Ali və Nino" kitab evində Bəstəkarlar İttifaqının üzvü, Bakı Musiqi Akademiyasının baş müəllimi, sənətşünaslıq namizədi Aygün Səmədzadənin "Məktəb illəri" mahnılar məcmuəsinin təqdimat mərasimi keçirildi. Mərasimdə respublikanın tanınmış elm adamları, incəsənət ustaları, eləcə də səbəbkarın doğmaları iştirak edirdilər. 
Təqdim olunan kitaba müəllifin müxtəlif illərdə ərsəyə gətirdiyi 22 mahnı daxil edilmişdir. Az qala əksər mahnıları əzbər bildiyimiz "Tut ağacı", "Məktəb illəri", "Bu dünyanı nağıl bilək", "Tənha Royal" və bir çox digər mahnılar toplusunun təqdimatda əsas məqsədi yazılı mahnı ədəbiyyatımızın çox da böyük olmayan siyahısında öz imzasını təsdiqləməklə yanaşı, musiqi ictimaiyyətimizi, musiqisevərləri öz mahnılarıyla bir daha yaxın ünsiyyətə dəvət etməkdir.
Mahnılar oxunur, sevilir, bəziləri unudulur. Deyirlər, oxunan hər mahnı bu günün, yazılansa sabahındır. Zaman gələcək, bir çox müğənnilərin repertuarından düşməyən sevimli bəstəkarın 100-ə yaxın bəstəsi zaman axarında qədim el havalarına qarışaraq milli musiqi xəzinəmizi zənginləşdirəcəkdir.

Rafiq SALMANOV, "Xalq qəzeti"