Moskva Dövlət Beynəlxalq Əlaqələr İnstitutunda tələbələr arasında keçirilən növbəti IV Olimpiya oyunlarında adı çəkilən ali təhsil ocağının Azərbaycan klubu qələbə əzmi ilə çıxış etmişdir. 
Ötən il olduğu kimi, bu il də komandamız olimpiyadanı uğurla başa çatdırmışdır. Bu il 5 qızıl, 3 gümüş, 3 bürünc medalla idmançılarımız bütün rəqiblərini geridə qoyaraq birinciliyə yüksəlmişdir. Əgər keçən il komandamız 14 medal hesabı ilə öndə idisə, bu il ilk dəfə olaraq qızıl medalların sayına görə turnir cədvəlinə başçılıq etmişdir.
Komandamız oğlanlar və qızlar arasında tennis turnirində və qaçış üzrə estafetdə hər 2 qızıl medala sahib olmuşlar. Qızlar arasında yüz metrlik məsafə qaçışında da qızıl medala bizim komandamız yiyələnmişdir. Diqqətə çatdırmaq istərdim ki, Azərbaycan klubunun Olimpiya oyunlarında bu uğuru məhz Azərbaycan klubunun Olimpiya komitəsi üzvlərinin əzmkar əməyinin nəticəsidir.
Moskva Dövlət Beynəlxalq Münasibətlər İnstitutunun IV Tələbə Oyunlarının yekun yarışları - mini-futbol üzrə Birlik Kubokunun finalı da uğurla nəticələnmişdir. Moskva Dövlət Beynəlxalq Münasibətlər İnstitutunda təhsil alan dünyanın 30-dan artıq ölkəsini təmsil edən 300-dən çox tələbə həmin oyunlarda iştirak etmişdir. Bu rekord göstərici olmaqla qeyd edilməlidir ki, 8-ci dəfə keçirilən mini-futbol üzrə Birlik Kubokunda 22 komandada 200-dən artıq tələbə iştirak etmişdir.
Oyunlarda ümumi hesabda birinci yeri 5-i qızıl olmaqla 11 medal qazanmış Azərbaycan komandası tutmuşdur. İkinci yerdə Rusiya, 3-cü yerdə Ermənistan, 4-cü yerdə Qırğızıstan, 5-ci yerdə isə Moldova komandaları təmsil olunmuşdur.
Ümumilikdə oyunlarda 24 dövlətin yığma komandası iştirak etmişdir.

Elvin ƏHMƏDOV, Moskva Dövlət Beynəlxalq Əlaqələr İnstitutunun Beynəlxalq əlaqələr fakültəsinin IV kurs tələbəsi, Azərbaycan klubunun Olimpiya komitəsinin prezidenti