Mayın 9-da Ukraynanın Vinnitsa Texniki Universitetində ulu öndər Heydər Əliyevin anadan olmasının 89-cu ildönümü qeyd edilmişdir.  
Universitetin azərbaycanlı tələbəsi Samir Hüseynovun təşkilatçılığı ilə keçirilən tədbirdə ulu öndər Heydər Əliyev haqqında, onun Azərbaycan üçün gördüyü işlər barədə məlumat verilmişdir.
Tədbirdə azərbaycanlı tələbələrlə yanaşı, universitetin professor- müəllim heyəti və 15 millətdən olan tələbələr iştirak etmişlər. Mərasimdə Süleyman Süleymanlı və Samir Hüseynov çıxış edərək Azərbaycanın tarixi, milli adət-ənənələri və gül bayramı haqqında tədbir iştirakçılarını məlumatlandırmışlar. S.Hüseynov çıxışında ümummilli lider Heydər Əliyevin respublikamız və xalqımız qarşısında misilsiz xidmətlərindən danışmış, Ukrayna və Azərbaycan arasında siyasi, iqtisadi və mədəni əlaqələri diqqətə çatdırmış, hazırda Prezident İlham Əliyev tərəfindən ölkələrimiz arasında bu əməkdaşlığın və münasibətlərin daha da möhkəmləndirilməsi istiqamətində fəaliyyətini vurğulamışdır.
Mərasimdə, həmçinin Azərbaycanın milli adət-ənənələri, mədəniyyəti, musiqisi və mətbəxi təbliğ olunmuşdur.
Qeyd edək ki, universitetin qəzetində tədbir barədə geniş məlumat dərc edilmişdir.