Azərbaycan Dövlət İqtisad Universitetində Bakı və respublikanın müxtəlif bölgələrində fəaliyyət göstərən, 11-i dövlət (Azərbaycan Dövlət İqtisad, Bakı Dövlət, Sumqayıt Dövlət, Naxçıvan Dövlət, Aqrar, Lənkəran Dövlət, Gəncə Dövlət, Gəncə Texnologiya, Azərbaycan Memarlıq və İnşaat universitetləri, Kooperasiya İnstitutu, Azərbaycan Dövlət Neft Akademiyası), 4-ü özəl ("Azərbaycan", "Qərb", Bakı Biznes, "Qafqaz" universitetləri) olmaqla 15 ali məktəbin tələbə və magistrantı arasında "Vergilər" mövzusunda 6-cı olimpiada keçirilmişdir. 
Olimpiada ümummilli lider Heydər Əliyevin anadan olmasının 89-cu ildönümünə həsr olunmuşdur. Olimpiadada ali məktəblərin 200-dən yuxarı tələbə və magistrantı iştirak etmişdir.
Test üsulu ilə təşkil olunmuş olimpiada zamanı iştirakçılar 2 saat ərzində Vergilər Nazirliyinin Tədris Mərkəzində müvafiq test bazası əsasında hazırlanan sualları kompyuter vasitəsilə "onlayn" rejimdə cavablandırmışlar. Hər bir tələbə üçün fərdi sual bazası tərtib olunmuşdur. Nəticələr iştirakçı ali məktəblərin təmsilçilərindən ibarət münsiflər heyətinin iştirakı ilə Tədris Mərkəzinin mütəxəssislərinin nəzarəti altında xüsusi kompyuter proqramları vasitəsilə qiymətləndirilmişdir.
Tələbələr arasında I yerə Babək Quliyev (Azərbaycan Universiteti), II yerə Nəsimi Yusifov (Azərbaycan Universiteti), III yer Tofiq Zeynalzadə (Azərbaycan Universiteti) layiq görülmüşlər.
Azərbaycan Universitetinin müəllimi Tofiq Hümbətova tələbəsi I yer tutduğuna görə xüsusi mükafat təqdim olunmuşdur.
Magistrantlar arasında isə I yerə Nurlan Nəcəfov (Azərbaycan Dövlət İqtisad Universiteti), II yerə Şahin Musabəyov (Azərbaycan Dövlət İqtisad Universiteti), III yerə Emin Mancanov (Azərbaycan Dövlət İqtisad Universiteti) layiq görülmüşlər.
Azərbaycan Dövlət İqtisad Universitetinin müəllimi Ramiz Məhərrəmova magistrantı I yer tutduğuna görə xüsusi mükafat verilmişdir.

"Xalq qəzeti"