Mayın 7-də Sumqayıt şəhərində, ulu öndər Heydər Əliyevin möhtəşəm abidəsinin qarşısındakı meydanda məktəb kollektivlərinin təntənəli hərbi keçidi olmuşdur.
Hərbi idman oyunları sahəsində zəngin təcrübəsi və mühüm nailiyyətləri olan gənclik şəhərinin məktəbli oğlan və qızları ümummilli liderin anadan olmasının 89-cu ildönümümü münasibətilə təşkil edilən paradda bir daha qabiliyyətlərini göstərmək imkanı qazandılar. Hərbi keçidə baxmaq üçün şəhər icra hakimiyyətinin başçısı Eldar Əzizov, Milli Məclisin üzvləri, hüquq-mühafizə orqanlarının rəhbərləri, idarə, müəssisə və təşkilatların nümayəndələri, həmçinin geniş ictimaiyyət meydana toplaşmışdı. Əvvəlcə ulu öndərin hərb sənətinə, Azərbaycan Silahlı Qüvvələrinin inkişafına və ölkəmizin müdafiə qüdrətinin güclənməsinə göstərdiyi diqqət və qayğı barədə məlumat verildi. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə ölkədə ordu quruculuğu proseslərinin uğurla davam etdiyi vurğulandı. Silahlı qüvvələrimizin düşmən işğalında qalan doğma Qarabağımızı tamamilə azad etməyə qadir olması inamı ifadə edildi. Sonra məktəblilərin təntənəli hərbi keçidi açıq elan olundu.
Öncə bayramsayağı bəzədilmiş hərbi təlim texnikası nümunələri vətənpərvərlik və döyüş ruhu aşılayan marş sədaları altında meydana daxil oldu. Ardınca Sumqayıtın ümumtəhsil məktəblərinin, lisey və gimnaziyaların komandaları təntənəli surətdə meydandan keçdilər. Bayraqdarlar və gənc komandirlər vüqarla öndə gedir, şux görkəmli sıra nəfərləri isə nizami addımlarla irəliləyərək sıra hazırlıqlarının necə mükəmməl olduğunu nümayiş etdirirdilər. Son dərəcə dəqiq hərəkətlər məktəblərdə ibtidai hərbi hazırlıq dərslərində çox böyük zəhmət çəkilməsindən soraq verirdi. Komandalar bir-birini əvəz etdikcə təntənəli marşlar, döyüş mahnıları da dəyişir, dalğa-dalğa ətrafa yayılırdı. Bütün bunlar, eləcə də süvari döyüş dəstələrinin meydanda görünməsi hərbi keçidi maraqla izləyən hər kəsdə ana qədər müqəddəs olan vətənə sonsuz məhəbbət, qəhrəmanlıq dolu hərb tariximizə, şanlı döyüş ənənələrimizə rəğbət və qürur hissləri aşılayırdı. Sumqayıt Şəhər Təhsil Şöbəsinin gənclər və idman baş idarəsinin təşkilati dəstəyi ilə düzənlədiyi tədbirdən heç bir məktəb kollektivi kənarda qalmamışdı. Aşağı sinif şagirdlərinin - balaca hərbçilərin keçidi də seyrçilərə xoş təsir bağışladı, əsl bayram sevinci yaşatdı.
Tədbirdən sonra mətbuat nümayəndələrinə müsahibə verən icra hakimiyyətinin başçısı E.Əzizov dedi ki, ulu öndərin xatirəsinə həsr olunan silsilə tədbirlər sırasında məktəblilərin təntənəli hərbi keçidi öz mütəşəkkilliyi baxımından xüsusilə yaddaqalan oldu. Bu kimi tədbirlər məktəb yaşlı uşaqlarda hərbi hazırlıq vərdişlərinin yaradılması, onların əsl vətənpərvərlik ruhunda tərbiyəsi və qəhrəmanlıq ənənələrinin yaşadılması baxımından çox önəmlidir.

Əli NƏCƏFXANLI, "Xalq qəzeti"nin bölgə müxbiri (Fotolar Məqsəd Quliyevindir)