Azərbaycan Respublikasının Prezidenti yanında Dövlət İdarəçilik Akademiyasında Şuşanın işğalının 20-ci ildönümünə həsr olunan "Şuşa: Azərbaycanın strateji əhəmiyyətli tarixi mədəniyyət mərkəzi" mövzusunda elmi-praktik konfrans keçirilmişdir. 
Tədbiri akademiyanın rektoru, akademik Urxan Ələkbərov açaraq, ermənilərin əsrlər boyu xalqımıza qarşı apardıqları təxribatlardan söhbət açmışdır. Rektor erməni silahlı qüvvələrinin işğal etdikləri Azərbaycan ərazilərində törədikləri vəhşilikləri diqqətə çatdırmış və Şuşanın işğalı nəticəsində Azərbaycana, onun mədəniyyətinə vurulan maddi-mənəvi zərərdən danışmışdır. U.Ələkbərov ümummilli lider Heydər Əliyevin hakimiyyətə qayıdışından sonra xalqımızın üzləşdiyi fəlakətlərin beynəlxalq təşkilatlara, dünya ictimaiyyətinə çatdırılması yönümündə gördüyü işləri, həyata keçirdiyi tədbirləri xatırlatdı. Rektor, həmçinin Azərbaycan Prezident İlham Əliyevin Şuşa şəhərinin işğalının 20-ci ildönümü ilə əlaqədar imzaladığı sərəncamı xatırladaraq onun əhəmiyyətindən danışdı.
Elmi-praktik konfransda iştirak edən professor-müəllim, tələbə və müdavimlər dosent F.Əhmədovanın "Şuşa-Azərbaycanın milli-mədəni mərkəzi kimi", dosent H.Məmmədovun "Şuşasız 20 il", dosent E.Əhmədovun "Şuşanın tarixi, siyasi və strateji əhəmiyyəti" mövzusunda məruzələrini dinlədilər.
Tədbirdə "Şuşa işgaldan əvvəl və sonra" adlı video slayd nümayiş etdirildi.

Əliqismət BƏDƏLOV, "Xalq qəzeti"