Bakı, 8 dekabr (AzərTAc). Yeniyetmələrin VI Beynəlxalq Elm Olimpiadasının iştirakçıları dekabrın 8-də Heydər Əliyev adına İdman-Konsert Kompleksində təcrübi tapşırıqları cavablandırmışlar.

Gənclər və idman nazirinin müavini İntiqam Babayev demişdir ki, artıq Heydər Əliyev Fondu, İJSO (International Junior Science Olympiad) və Azərbaycan Milli Elmlər Akademiyasının dəstəyi ilə keçirilən olimpiadanın imtahanları başa çatmışdır. Kimya, fizika və biologiya fənlərini əhatə edən Beynəlxalq Elm Olimpiadası 3 mərhələdən - test, nəzəri və təcrübi tapşırıqların yerinə yetirilməsindən ibarət olmuşdur.

Olimpiadada dünyanın 5 qitəsindən olan 258 iştirakçı 3 saat ərzində 30 sualdan ibarət test, nəzəri və təcrübi tapşırıqları cavablandırmışdır. Cavabları olimpiadanın Elm Komitəsi tərəfindən seçilən 18 təcrübəli müəllim yoxlayacaqdır.

Başa çatan test və nəzəri imtahanlarda ən yüksək göstərici 30 baldır. Son təcrübə sınağında isə 3 nəfərdən ibarət komandanın ən yüksək qiyməti 40 bal hesab olunacaqdır.
Bildirilmişdir ki, yeniyetmələrin müəllimləri Azərbaycanın 30-dək tanınmış mütəxəssisinin cəmləşdiyi olimpiadanın Elm Komitəsi tərəfindən hazırlanmış tapşırıqları yüksək qiymətləndirmişlər.

Vurğulanmışdır ki, olimpiadanın nəticələrinə görə, ən yüksək bal toplayacaq yeniyetmələrdən 27-si qızıl, 54-ü gümüş, 80-i isə bürünc medal qazanacaqdır. Bundan əlavə, olimpiadanın şərtlərinə uyğun olaraq, ən yüksək nəticə göstərəcək iştirakçıya kubok təqdim ediləcəkdir.
Olimpiadanın qalibləri dekabrın 10-da mükafatlandırılacaqlar.