Azərbaycanın görkəmli alim-geoloqu, Azərbaycan Milli Elmlər Akademiyasının (AMEA) həqiqi üzvü Musa Əliyev haqqında "İstedadın çalarları" kitabı çapdan çıxmışdır. 
Geologiya İnstitutunun mətbuat xidmətindən AzərTAc-a bildirmişlər ki, nəşrin müəllifi Beynəlxalq Neft Şərq Akademiyasının vitse-prezidenti, geologiya-mineralogiya elmləri doktoru professor Çapay Sultanov, redaktoru AMEA Geologiya İnstitutu direktorunun müavini akademik İbrahim Quliyevdir.
Kitab unudulmaz alimin elmi, elmi-təşkilati və pedaqoji fəaliyyətindən bəhs edir. Burada M.Əliyevin neft elminə töhfələri və elmi əsərləri barədə məlumatlar da geniş yer almışdır. Onun ictimai-siyasi xidmətləri ilə əlaqəli arxiv sənədləri nəşri maraqlı edən materiallardandır.
Rus dilində yazılmış kitab "Çaşıoğlu" mətbəəsində işıq üzü görmüşdür.

AzərTAc