Heydər Əliyev Fondunun əsas fəaliyyət istiqamətlərindən biri də respublikamızın bütün bölgələrində təhsil müəssisələrinin inşası və əsaslı təmiri istiqamətində görülən işlərdir. 
Fondun "Yeniləşən Azərbaycana yeni məktəb" layihəsi çərçivəsində Xəzər rayonunda yararsız vəziyyətdə olan məktəb binaları sökülərək yenidən tikilmiş, yüksək səviyyədə əsaslı təmir olunmuş və müasir avadanlıqla təchiz edilmişdir. Bu yenidənqurma işləri indi də yüksək templə davam etdirilir.
Rayon icra hakimiyyətindən bildirmişlər ki, hazırda Heydər Əliyev Fondunun təşəbbüsü ilə Şüvəlan qəsəbəsində 78 nömrəli uşaq bağçasının və Buzovna qəsəbəsindəki 5 nömrəli Texniki Peşə Liseyinin binalarında əsaslı təmir işləri aparılır, Binə qəsəbəsində isə 640 yerlik yeni məktəbin binasında tikinti işləri davam etdirilir. Tədris ocaqlarında kompyuter otaqları, akt və idman zalları, laboratoriyalar, kitabxana, həkim kabineti, əmək emalatxanaları fəaliyyət göstərəcəkdir.

AzərTAc