Romada Beynəlxalq Münasibətlər İnstitutu (BMİ) "Azərbaycanda demokratik institutlar və insan hüquqları" mövzusunda konfrans keçirmişdir.
Azərbaycanın İtaliyadakı səfirliyindən bildirmişlər ki, tədbiri BMİ-nin direktoru, professor Ettore Qreko açmışdır.
Konfransda BMİ-nin direktor müavini xanım Natali Toççi, ABŞ-ın Azərbaycandakı sabiq səfiri Mətyu Brayzə, Beynəlxalq Böhran Qrupunun Cənubi Qafqaz üzrə layihə rəhbəri Laurens Şits və Azərbaycan Diplomatik Akademiyasının beynəlxalq əlaqələr fakültəsinin dekanı Anar Vəliyev çıxış etmişlər. İngiltərənin Sülh İmkanları təşkilatının Qafqaz üzrə layihə rəhbəri Mark Behrendt isə tədbirin aparıcısı olmuşdur.
Tədbirdə ölkəmizin müstəqilliyini bərpa etdiyi son 20 il ərzində demokratikləşmə, əsas insan hüquq və azadlıqlarının təmini sahəsində görülmüş işlər, əldə olunmuş nailiyyətlər, mövcud problemlər barədə məlumat verilmiş və onların aradan qaldırılması ilə bağlı mülahizələr irəli sürülmüşdür.
Tədbirdə mövzu ilə bağlı suallar cavablandırılmış və fikir mübadiləsi aparılmışdır.
Konfransda İtaliyanın akademik, dövlət və işgüzar dairələrinin, mətbuat orqanlarının və Romada akkreditə olunmuş diplomatik korpusun nümayəndələri iştirak etmişlər.
Qeyd edək ki, bu konfrans BMİ-nin Azərbaycan ilə bağlı keçirməyi planlaşdırdığı silsilə tədbirlərin üçüncüsüdür. İl ərzində BMİ tərəfindən Azərbaycan ilə bağlı digər mövzuda konfransların da keçirilməsi nəzərdə tutulmuşdur.