Azərbaycan Turizm İnstitutunun bir qrup əməkdaşı Şimali Kiprdən təzəcə qayıtmışdır. Onlar Şimali Kipr Türk Cümhuriyyətinin Doğu Akdeniz Universiteti ilə Azərbaycan Turizm İnstitutu arasında 2010-cu il iyunun 2-də bağlanmış əməkdaşlıq müqaviləsinin şərtlərinə əsasən Doğu Akdeniz Universitetində (DAU) "XXI əsrdə turizmin və mədəniyyətin menecmentinin tədrisində kurrikulumun rolu" mövzusuna həsr olunmuş təcrübə mübadiləsi kursunun dinləyicisi olmuşdur.
Yanvarın 28-dən fevralın 5-dək davam edən beynəlxalq mübadilə kursunda ATİ-nin əməkdaşları əsasən TedQual sertifikatının alınması üçün lazımi sənədləşmə və prosedurlarla tanış olmuş, sillabus və kurrikulumların tərtibatı üzrə təcrübə mübadiləsi aparmış, gələcək əməkdaşlığın parametrlərini yenidən nəzərdən keçirmişlər.
Azərbaycan Turizm İnstitutu turizm işinin təşkili və idarəedilməsi fakültəsinin dekanı, fizika- riyaziyyat elmləri namizədi, dosent Nəsrulla Nəsirli təcrübə mübadiləsi ilə bağlı təəssüratlarını bölüşərkən bildirdi ki, səfər çərçivəsində, həmçinin ATİ ilə DAU arasında tələbə mübadiləsi, yay məktəbinin və dil kurslarının təşkili, magistrlər üçün ikili diplom proqramlarının hazırlanması istiqamətində geniş fikir mübadiləsi aparılmış, "Elektron şəbəkə dərs sistemi və moodle texnologiyaları 2012" mövzusuna həsr edilmiş beynəlxalq kursda iştiraka dəvət təklifi alınmışdır.
Onu da qeyd edək ki, ATİ-DAU arasında bağlanmış əməkdaşlıq müqaviləsi bu təhsil ocaqlarının təhsil və təcrübə sahəsində faydalı əməkdaşlığını ehtiva edən göstəricidir.

Z. BƏŞİRQIZI, "Xalq qəzeti"