Dekabrın 9-da Azərbaycan Tibb Universitetində (ATU) görkəmli iqtisadçı alim, Azərbaycan Milli Elmlər Akademiyasının müxbir üzvü, əməkdar elm xadimi, iqtisad elmləri doktoru, professor Aqil Əlirza oğlu Əliyevin anadan olmasının 85 illik yubileyinə həsr edilmiş tədbir keçirilmişdir. 
Tanınmış alimlərin və mütəxəssislərin, ictimaiyyət nümayəndələrinin iştirak etdikləri tədbirdə ATU-nun rektoru, akademik Əhliman Əmiraslanov, iqtisadiyyat və hüququn əsasları kafedrasının müdiri, dosent Yavər Vəliyev görkəmli alim A.Əliyevin mənalı ömür yolundan, geniş elmi-pedaqoji fəaliyyətindən danışmış, onun qazandığı nailiyyətləri diqqətə çatdırmışlar.
Qeyd edilmişdir ki, professor Aqil Əliyev 1926-cı il dekabrın 10-da Naxçıvan şəhərində anadan olmuşdur. O, 1951-ci ildə Bakı Dövlət Universitetini bitirmiş, Azərbaycan Elmlər Akademiyasının Tarix İnstitutunda elmi işçi vəzifəsində və sonra 53 il Azərbaycan Dövlət Tibb İnstitutunda siyasi iqtisad kafedrasında çalışmış və uzun müddət bu kafedraya rəhbərlik etmişdir.
1970-ci ildə iqtisad elmləri namizədi, 1983-cü ildə iqtisad elmləri doktoru elmi dərəcələrinə layiq görülmüşdür.
Alim 1996-cı ildə Beynəlxalq Enerji-İnformasiyası Elmlər Akademiyasının Azərbaycan Bölməsinin həqiqi üzvü, 2001-ci ildə Azərbaycan Milli Elmlər Akademiyasının müxbir üzvü, 2003-cü ildə Beynəlxalq Menecment Akademiyasının həqiqi üzvü, 2006-cı ildə Beynəlxalq İqtisadçılar İttifaqının üzvü seçilmişdir.
A.Əliyev 200-dək elmi əsərin, o cümlədən 32 monoqrafiya və kitabın müəllifidir. Onun bir sıra əsərləri Moskvada, Sankt-Peterburqda, Cexiyada və digər xarici ölkələrdə nəşr olunmuşdur. Aqil Əliyev ATU-da tədris işinin təkmilləşdirilməsində səmərəli xidmətlər göstərmişdir. O, ilk dəfə səhiyyənin iqtisadi problemlərini tədqiq etmişdir. Yüksək ixtisaslı iqtisadçı və tibb kadrlarının hazırlanmasında da alimin mühüm rolu olmuşdur.
Professor A.Əliyev səmərəli elmi-pedaqoji fəaliyyətinə görə "Əməkdar elm xadimi" fəxri adına, "Qırmızı əmək bayrağı", "Şöhrət" ordenlərinə və digər yüksək mükafatlara layiq görülmüşdür.
Alim respublikada və dünyanın ayrı-ayrı ölkələrində keçirilən elmi simpoziumlarda və konfranslarda müxtəlif mövzularda məruzələr etmişdir.
Professor A.Əliyevin "Azərbaycanın sosial inkişafında islahatların rolu", "İpək Yolunun bərpası bəşəriyyətin tərəqqi yoludur", "Səhiyyənin iqtisadiyyatı", "Müstəqil Azərbaycan iqtisadiyyatının aktual problemləri" və digər kitabları elmə dəyərli töhfələr olmuşdur. Alimin rəhbərliyi altında neçə-neçə namizədlik və doktorluq dissertasiyaları müdafiə edilmişdir.
AMEA-nın İqtisadiyyat İnstitutunun direktoru, professor İsa Alıyev, ATU-nun tədris-terapevtik klinikasının direktoru, professor Surxay Musayev, anatomiya kafedrasının müdiri, professor Vaqif Şadlinski, fəlsəfə kafedrasının müdiri, professor Qoşqar Əliyev və digər alimlər də professor A.Əliyevin zəngin elmi yaradıcılığından, əsərlərinin əhəmiyyətindən, yüksək insani keyfiyyətlərindən bəhs etmiş, onunla bağlı xatirələrini söyləmiş, alimin əziz xatirəsinin ürəklərdə daim yaşayacağını vurğulamışlar.