Azərbaycan Respublikasının Prezidenti yanında Dövlət İdarəçilik Akademiyasında qısamüddətli ixtisasartırma kursunun növbəti buraxılışı başa çatmışdır. "Dövlətin sosial siyasəti: mahiyyət, prioritetlər və həyata keçirilmə mexanizmləri" istiqaməti üzrə kursda dövlət hakimiyyətinin mərkəzi, şəhər, rayon miqyaslı orqanlarının, müvafiq nazirlik, komitə və idarələrin rəhbər işçiləri iştirak etmişlər.
Kursun əsas məqsədi "2006-2015-ci illərdə Azərbaycan Respublikasında yoxsulluğun azaldılması və davamlı inkişaf" Dövlət Proqramının şərh edilməsi, bu sahədə dövlət siyasətinin mahiyyəti və strategiyasının açıqlanması, sosial islahatlar, müasir Azərbaycanda sosial siyasətin formalaşması prosesi, dövlət siyasətinin aktual məsələləri və digər problemlərlə bağlı biliklərin sistemləşdirilməsi, dinləyicilərə yeni məlumatların verilməsi idi.
Tematik plan üzrə kursda Azərbaycan Respublikasında pensiya islahatlarının mahiyyəti və problemləri, pensiya siyasəti və onun həyata keçirilməsi, Azərbaycanda sosial siyasət və onun əsas istiqamətləri, sosial inkişaf üzrə proqramların istiqamətləri, hazırlanma metodologiyası və layihələrin həyata keçirilmə mexanizmləri, dövlətin səhiyyə sistemində siyasəti və bu sahədə aparılan islahatlar əhatə edilirdi.
Kursda Dövlət Sosial Müdafiə Fondunun sədr müavinləri Elman Mehdiyev, Zakir Babayev, Milli Məclisin sosial siyasət komitəsinin sədri Hadi Rəcəbli, həmin komitənin sədr müavini Musa Quliyev, Milli Məclisin sosial qanunvericilik şöbəsinin sektor müdiri Adil Vəliyev, ARDNŞ-in birinci vitse-prezidentinin müşaviri, professor Eldar Şahbazov, Qaçqın və Məcburi Köçkünlərlə İş üzrə Dövlət Komitəsinin şöbə müdiri İsbəndiyar Əbdüləzimov, Əmək və Əhalinin Sosial Müdafiəsi Nazirliyinin əməkdaşları Zemfira Rəhimova, İsgəndərzadə Mustafayev, Fuad Cabbarov, Vüqar Həsənov, Rəna Abdullayeva, Ürfət Mürşüdov, Məhərrəm Məhərov, Hüseyn Hüseynov, Eldar Məmmədov, Dövlət Sosial Müdafiə Fondunun əməkdaşları Günay Bağırova, Elnur Məcidov, Şəlab Cəfərova, İdris İsayev, Aynur Atayeva, Səhiyyə Nazirliyinin İctimai səhiyyə və islahatlar mərkəzinin şöbə müdiri Aris Rüstəmov, Səhiyyə Nazirliyinin səhiyyə sektorunda islahatlar layihəsinin əməkdaşı Olqa Zues, Azərbaycan Həmkarlar İttifaqları Konfederasiyasının təşkilat işləri və məlumat şöbəsinin mütəxəssisi Əzizə Şamilova və digər tanınmış alim-mütəxəssislər dinləyicilər qarşısında sosial siyasətin müasir problemlərinə dair müxtəlif mövzularda mühazirələrlə çıxış etmişlər. Təhsil müddəti ərzində dinləyicilər Milli Məclis, Əmək və Əhalinin Sosial Müdafiəsi Nazirliyi, Dövlət Sosial Müdafiə Fondu və Səhiyyə Nazirliyinin İctimai-səhiyyə və islahatlar mərkəzində səyyar məşğələlər keçərək müasir Azərbaycanda sosial siyasətin formalaşması və bu sahədə dövlət siyasətinin aktual məsələləri ilə tanış olmuşlar.
Azərbaycan Respublikasının Prezidenti yanında Dövlət İdarəçilik Akademiyasında dinləyicilərin buraxılışı ilə əlaqədar tədbir keçirilmişdir. DİA-nın rektor əvəzi, professor Əlikram Abdullayev dinləyicilər qarşısında çıxış edərək, onlara kursu müvəffəqiyyətlə bitirdiklərinə görə vəsiqələri təqdim etmiş və gələcək işlərində uğurlar arzulamışdır.

Əliqismət BƏDƏLOV, "Xalq qəzeti"