Bu günlərdə Bolqarıstan Respublikasının paytaxtı Sofiya şəhərində Milli və Dünya İqtisadiyyatı Universitetində "XXI əsrdə turizmin problemləri" adlı beynəlxalq elmi konfrans keçirilmişdir. 1920-ci ildən fəaliyyət göstərən bu təhsil ocağının iki institut və 8 fakültəsində ali təhsilin bütün pillələrində (bakalavr, magistr və doktorantura) 35 ixtisas üzrə kadr hazırlığı aparılır. Hazırda bu ali təhsil ocağında 17 mindən çox tələbə təhsil alır. Qeyd etmək lazımdır ki, Azərbaycan Respublikasının Prezidenti cənab İlham Əliyev də həmin Milli və Dünya İqtisadiyyatı Universitetinin "Fəxri doktoru"dur.
Beynəlxalq elmi konfrans universitetin "Turizmin iqtisadiyyatı" kafedrasının 20 illik yubileyinə həsr edilmişdi. Beş ölkəni təmsil edən nümayəndələr konfransın 3 bölməsində müasir şəraitdə turizmin inkişaf perspektivlərinə həsr olunmuş fikirlərini həmkarlarının diqqətinə çatdırmışlar. Azərbaycan Turizm İnstitunun 4 əməkdaşı -dosent Bahadur Bilalov, müəllimlər Qəhrəman Yusupov, Şəmsiyyə Tahirbəyova və Rəfiqə Nəcəfova konfransın işində iştirak etmişlər. Nümayəndə heyətinin rəhbəri Bahadur Bilalov bildirmişdir ki, ATİ əməkdaşlarının ölkə turizminə həsr olunmuş məruzələri konfrans iştirakçılarının böyük marağına səbəb olmuş, verilən çoxsaylı suallar hərtərəfli cavablandırılmışdır.
Beynəlxalq konfrans iştirakçılarından - Fransadakı Sahilyanı Opal Joast Universiteti, Tbilisi Dövlət Universitetinin Beynəlxalq Turizm kollecini təmsil edən nümayəndələr Azərbaycan Turizm İnstitutu ilə əməkdaşlıqda maraqlı olduqlarını nəzərə çatdırmışlar.

Z. BƏŞİRQIZI, "Xalq qəzeti"