Bakı Dövlət Universitetində (BDU) "Müstəqil Azərbaycanda dini təhsil" mövzusunda konfrans keçirilmişdir. 
Azərbaycan Respublikası Dini Qurumlarla İş üzrə Dövlət Komitəsi nümayəndələrinin və Bakı Dövlət Universitetinin müvafiq fakültələrinin müəllim və tələbələrinin iştirak etdikləri konfransda BDU-nun rektoru, Milli Məclisin deputatı, akademik Abel Məhərrəmov ulu öndər Heydər Əliyevin elmə, təhsilə daim böyük önəm verdiyini, ümummilli liderin siyasətinin Azərbaycan Prezidenti İlham Əliyev tərəfindən əzmlə davam etdirildiyini bildirmişdir.
Din və dini təhsil barədə fikirlərini qeyd edən rektor dinin, o cümlədən İslam dininin elmi əsaslarla, elmi düşüncələrlə öyrənilməsinin zəruriliyini vurğulamış, BDU-nun ilahiyyat fakültəsinin fəaliyyətindən danışmışdır.
Azərbaycan Respublikası Dini Qurumlarla İş üzrə Dövlət Komitəsinin (DQİDK) sədri Hidayət Orucov DQİDK-nın fəaliyyəti barədə məlumat vermiş, qurumda BDU-nun 32 məzununun, o cümlədən ilahiyyat fakültəsinin 22 məzununun çalışdığını diqqətə çatdırmışdır.
Dövlət və din münasibətlərindən bəhs edən sədr Azərbaycanda vətəndaşların dini etiqad azadlığının təmin olunması üçün bütün lazımi tədbirlərin həyata keçirildiyini söyləmişdir. H.Orucov yüksək ixtisaslı ilahiyyatçı mütəxəssislərin hazırlanmasının vacibliyini də nəzərə çarpdırmış, tələbələrə tövsiyələrini vermişdir.
BDU-nun ilahiyyat fakültəsinin dekanı akademik Vasim Məmmədəliyev rəhbərlik etdiyi fakültədə təhsilin inkişafı üçün reallaşdırılan tədbirlərdən, qazanılan uğurlardan danışmışdır.
Sonra mövzu üzrə müzakirələr aparılmışdır.

AzərTAc