Noyabrın 12-də Vestminster Universitetinin professoru, TEMPUS layihəsinin İngiltərə üzrə koordinatoru Nino Porakişvilinin başçılıq etdiyi nümayəndə heyəti Bakı Dövlət Universitetində (BDU) olmuşdur.
BDU-nun mətbuat xidmətindən bildirmişlər ki, görüşdə Bakı Dövlət Universitetinin TEMPUS Proqramı üzrə "Cənubi Qafqazda biotibbi elmlər sahəsində elektron təhsilin və distant kursların İnkişaf etdirilməsi" adlı beynəlxalq layihənin iştirakçısı olduğu diqqətə çatdırılmışdır. Bildirilmişdir ki, bu layihədə İngiltərənin Vestminster Universiteti, İtaliyanın Aquila Universiteti, Fransanın Brest Universiteti kimi Avropanın qabaqcıl təhsil müəssisələri ilə yanaşı, Cənubi Qafqazdan BDU, Azərbaycan Dövlət Tibb Universiteti, Tbilisi Dövlət Universiteti və digər ali təhsil ocaqları iştirak edir.
Professor Nino Porakişvili vurğulamışdır ki, layihənin məqsədi Cənubi Qafqaz universitetlərində elektron və distant təhsil vasitəsilə tibbi molekulyar biologiya sahəsini inkişaf etdirmək və bu sahədə magistrantların birgə hazırlanmasıdır. N.Porakişvili qeyd etmişdir ki, BDU-nun dörd əməkdaşı Avropanın nüfuzlu universitetlərində molekulyar biologiya sahəsində ikihəftəlik distant və elektron təhsil üzrə təlimlərdə uğurla iştirak etmişlər.
BDU-nun rektoru, Milli Məclisin deputatı, akademik Abel Məhərrəmov rəhbərlik etdiyi ali təhsil müəssisəsi ilə tərəfdaş Avropa universitetləri arasında distant təhsilin qurulması üçün ayrılmış vəsait hesabına 10 kompyuterin alındığını və distant təhsil üçün xüsusi otağın yaradıldığını bildirmişdir. Rektor bu layihə çərçivəsində BDU-da magistratura pilləsində tibbi molekulyar biologiya ixtisasının açılmasının, təhsilin Vestminster Universitetinin proqramına uyğun olaraq ingilis dilində keçirilməsinin nəzərdə tutulduğunu diqqətə çatdırmışdır. Bu ixtisas üzrə qəbul olunan magistrantlar molekulyar biologiya sahəsində distant təhsil ala biləcək, təhsillərini başa vurduqdan sonra həm BDU-nun, həm də Vestminster Universitetinin ikili magistr diplomlarını alacaqlar.