Xətai Rayon İcra Hakimiyyəti Azərbaycan Respublikası dövlət müstəqilliyinin bərpa edilməsinin 20 illiyinə həsr etdiyi silsilə tədbirlərə dünən rayonun orta ümumtəhsil məktəblərinin şagirdləri arasında keçirilən inşa yazı və şeir müsabiqəsinin qaliblərini mükafatlandırma mərasimi ilə yekun vurdu.
Rayonun Heydər Əliyev adına liseyində keçirilən mərasim Xətai Rayon İcra Hakimiyyəti başçısının, qonaqların və iştirakçıların ulu öndərin məktəbin qarşısında qoyulmuş büstünü ziyarətlə başladı. Mərasim iştirakçılarının da şagirdlərlə birgə Azərbaycan Respublikasının dövlət himnini canlı oxumasından sonra tədbirin rəsmi hissəsi başladı.
Xətai Rayon İcra Hakimiyyətinin başçısı R.Məmmədov çıxış edərək dövlət müstəqilliyinin bərpasının 20 illiyinə həsr olunmuş inşa yazı müsabiqəsinin və Dövlət himninin sözlərinə aid şeir müsabiqəsinin qaliblərini təbrik etdi və onlara təhsildə uğurlar arzulayaraq bildirdi ki, onların hər biri bu müstəqilliyə öz töhfələrini vermək üçün səylə oxumalı, yüksək təhsil alıb gözəl mütəxəssis olmalıdırlar.
Natiq, eyni zamanda, bütün şagirdlərin vətənpərvərlik ruhunda tərbiyə olunmalarını, ulu öndər Heydər Əliyev ideyalarına sədaqətlə xidmət göstərmələrini istədi və bu işdə orta məktəb müəllimlərinin üzərinə böyük məsuliyyət düşdüyünü bildirdi.
Sonra R.Məmmədov inşa yazı müsabiqəsinin qaliblərinə I yeri tutmuş 261 saylı məktəbin VIII b sinif şagirdi Məleykə Baxşəliyevaya və II yeri tutmuş Heydər Əliyev adına liseyin IXa sinif şagirdi Dilarə Yaqubovaya, III yeri tutmuş 48 saylı məktəbin IX a sinif şagirdi Fatimə Əsgərovaya və şeir müsabiqəsinin üç qalibinə Xətai rayon İcra Hakimiyyətinin fəxri fərmanlarını və qiymətli hədiyyələri təqdim etdi.
Rəsmi hissə başa çatdıqdan sonra şagirdlərin ifasında əbədi-bədii kompozisiya nümayiş etdirildi.

İ.RÜSTƏMOV. R.SALMANOV (foto), "Xalq qəzeti"