Suraxanı rayonunda Beynəlxalq Müəllimlər Günü münasibətilə geniş tədbir keçirilmişdir. Rayon ərazisində yerləşən təhsil müəssisələrində çalışan işçilərin bir qrupunun qatıldığı tədbirdə ali məktəblərə qəbul imtahanlarında yüksək nəticə göstərən məzunlar və dərs əlaçısı olan 11-ci sinif şagirdləri də iştirak etmişlər.
Tədbir iştirakçıları əvvəlcə Heydər Əliyev parkında ucalan ulu öndərin abidəsini ziyarət etmiş və Heydər Əliyev mərkəzi ilə tanış olmuşlar. Daha sonra mərkəzin üçüncü mərtəbəsində elektron lektoriya zalında tədbir davam etdirilmişdir.
Tədbiri giriş sözü ilə açan rayon icra hakimiyyətinin başçısı İlqar Abbasov Azərbaycan xalqının milli təfəkküründə müəllim adının hər zaman ucalıq, ziyalılıq və mənəvi saflıq rəmzi kimi təcəssüm olunduğunu, böyük hörmətlə, yüksək ehtiramla çəkildiyini bildirmişdir. Natiq göstərmişdir ki, sosial statusundan, tutduğu vəzifədən asılı olmayaraq, bu gün hər bir azərbaycanlı cəmiyyətdəki mövqeyinə, qazandığı biliklərə, ümumiyyətlə, bir şəxsiyyət kimi formalaşmasına görə özünü məhz müəllimlərinə borclu sayır. Ölkəmizdə bütün sahələrdə olduğu kimi, son illər ərzində təhsil sahəsində də çox ciddi irəliləyişlər, nəzərə çarpacaq uğurlar əldə edilmişdir. Bu uğurlar hər birimizi sevindirir və fərəhləndirir. Memarı və qurucusu ümummilli liderimiz Heydər Əliyev olan müstəqil respublikamızda bu uğurların əldə olunması ulu öndərin qoyduğu strategiyanın Prezident İlham Əliyev tərəfindən uğurla həyata keçirilməsi ilə bağlıdır.
Başçı həmçinin qeyd etmişdir ki, rayonda fəaliyyət göstərən təhsil ocaqları ötən tədris ilində bir sıra uğurlara imza atıb. 104, 141, 279, 282, 318 saylı tam orta məktəblər "Ən yaxşı ümumtəhsil məktəbi" müsabiqəsinin qalibləri olmuşlar. Minə yaxın orta məktəb məzunu müxtəlif ali məktəblərə daxil olmuş, onlardan 11-i 650-dən yuxarı bal toplamışdır. Məzunlardan 4-ü Prezident təqaüdünə layiq görülmüşdür.
Tədbirdə Milli Məclisin deputatı Fərəc Quliyev, rayon icra hakimiyyəti başçısı aparatının Təhsil, səhiyyə və mədəniyyət şöbəsinin müdiri Barxudar Barxudarov, "Ən yaxşı ümumtəhsil məktəbi" müsabiqəsinin qalibi, 141 saylı tam orta məktəbin direktoru Fərəh Hüseynova, 114 saylı tam orta məktəbin müəllimi Fəridə Məmmədzadə, Prezident təqaüdçüsü Samir Musalı çıxış etmişlər.
Beynəlxalq Müəllimlər Günü münasibəti ilə təhsil sahəsində qazandığı uğurlara və 2011- ci ildə rayonun ictimai həyatında fəal iştirakına görə bir qrup təhsil müəssisəsi, Prezident təqaüdçüləri və qəbul imtahanlarında yüksək nəticə göstərən məzunlar rayon icra hakimiyyəti başçısının Fəxri Fərmanı və qiymətli hədiyyələrlə təltif olunmuşlar.
Sonda Səttar Bəhlulzadə adına mədəniyyət evinin özfəaliyyət kollektivinin konserti olmuşdur.

Vaqif BAYRAMOV, "Xalq qəzeti"