Dünən Beynəlxalq Müəllimlər Günü münasibəti ilə paytaxtın Xətai rayonunda keçirilən bayram toplantısı rayonun Heydər Əliyev parkından başlamışdır. Xətai Rayon İcra Hakimiyyətinin rəhbərliyi, təhsil müəssisələrinin nümayəndələri və tədbirə qatılan qonaqlar ulu öndərin parkda ucaldılmış abidəsi önünə tər çiçək dəstələri qoymuş və xatirəsini anmışlar.
"Viktoriya" şadlıq sarayında təşkil olunmuş tədbirdə öncə Xətai rayon təhsil işçilərinin son illər ərzində əldə olunan uğurlarından danışılmış və ötən tədris ilinin nailiyyətləri barədə qonaqlara ətraflı məlumat verilmişdir. Sonra təbrik üçün söz alan Xətai Rayon İcra Hakimiyyətinin başçısı Razim Məmmədov müəllim əməyinin xalqımız və dövlətimiz üçün misilsiz əhəmiyyətindən danışaraq demişdir:
- Qeyd olundu ki, ötən tədris ilində rayonumuzda 2860 məzun orta təhsili uğurla başa vurmuş və onlardan 2688 nəfəri ali məktəbə qəbul üçün sənəd vermişdir. Çox sevindirici haldır ki, bu məzunlardan 1422 nəfəri bu gün bayramına toplaşdığımız müəllimlərin zəhmətini uğurlu nəticələrlə doğrulda bilmişlər. Məhz rayonumuzun müəllimlərinin bu halal və gərgin əməyi sayəsində ali məktəbə qəbul göstəricilərinə görə Xətai rayonu ötən il olduğu kimi bu il də respublikada birinci yeri tutmuşdur.
Məzunlardan 2 nəfəri ən yüksək nəticə - 700 bal toplayaraq bu göstəricidə də müəllimlərinə şərəf gətirmişlər. Azərbaycan Respublikası Prezidentinin təqaüdünə layiq görülən 102 nəfərdən 10 nəfəri yenə bizim müəllimlərin yetirmələri olub. Bu nəticələri sadalamaqda məqsədimiz ondan ibarətdir ki, müəllimlərimizin öz şərəfli və son dərəcə məsuliyyətli peşələrinə necə böyük sevgi ilə yanaşdığını bir daha diqqətə çatdıraq.
R.Məmmədov son illər Azərbaycan Prezidenti cənab İlham Əliyevin strateji sahə olan təhsilə böyük diqqət yetirdiyini, ölkədə az bir zamanda yüzlərlə yeni məktəb binasının tikildiyini, ölkəmizin gənclərinin xarici ölkələrin qabaqcıl ali məktəblərinə təhsil almaq üçün göndərildiyini və təhsil işçilərinin sosial-iqtisadi problemlərinin həllinə dövlət qayğısının artdığını konkret faktlar və rəqəmlərlə diqqətə çatdırdı və bildirdi ki, bu diqqət və qayğı Xətai rayonundan da yan keçməmişdir.
- Ötən tədris ilinin yekunlarına görə dövlət başçısının sərəncamı ilə 10 müəllimimiz "İlin ən yaxşı müəllimi" və bir məktəbimiz "İlin ən yaxşı məktəbi" müsabiqəsinin qalibi kimi pul mükafatına layiq görülmüşdür. Bu gözəl bayram ərəfəsində - oktyabrın 3-də isə Azərbaycan Prezidentinin sərəncamı ilə bir müəllimimiz "Əməkdar müəllim" adına layiq görülmüşdür.
Çıxışının sonunda natiq müstəqil Azərbaycanın inkişafı üçün son dərəcə vacib olan gənc nəslin təlim-tərbiyəsində göstərdikləri xidmətə, şərəfli əməyə görə rayonun müəllimlərinin simasında xalqımızın bütün müəllimlərini təbrik etdi və onlara yeni-yeni uğurlar arzuladı.
Tədbirdə Milli Məclisin deputatı, YAP Xətai rayon təşkilatının sədri professor Hüseynbala Mirələmov və digər qonaqlar da müəllimlərə ürək sözlərini deyib onları təbrik etdilər. Sonda qazandıqları uğurlara görə 20-yə yaxın müəllimə Xətai Rayon İcra Hakimiyyəti başçısının fəxri fərmanları və qiymətli hədiyyələri verildi.
Tədbirin rəsmi hissəsi başa çatdıqdan sonra incəsənət ustalarının iştirakı ilə bayram konserti oldu.

İ.RÜSTƏMOV, R.SALMANOV (foto), "Xalq qəzeti"