Nəsimi rayonunda Beynəlxalq Müəllimlər Günü münasibətilə tədbir keçirilib. 
Nəsimi Rayon İcra Hakimiyyəti və Azərbaycan Təhsil İşçiləri Azad Həmkarlar İttifaqı Nəsimi Rayon Komitəsinin təşkil etdikləri tədbiri rayon icra hakimiyyətinin başçısı Nəsib Məhəməliyev açaraq təhsil işçilərini əlamətdar gün münasibətilə təbrik etdi və onlara şərəfli fəaliyyətlərində uğurlar arzuladı. O bildirdi ki, son illər ölkəmizdə bütün sahələrdə olduğu kimi təhsildə də böyük inkişafa nail olunub. Azərbaycanda ildən-ilə təhsilin səviyyəsi artır, müasir tələblərə cavab verən təhsil müəssisələri inşa edilir və bu sahədə çalışan insanların maddi rifah halı yüksəlir.
Əvvəlki illərdə olduğu kimi 2010-2011 -ci tədris ilində də bu sahədə Nəsimi rayüonunda nailiyyətlər əldə edilib. Rayondakı 4 məktəb "İlin ən yaxşı məktəbi", 17 pedaqoq isə "İlin ən yaxşı müəllimi" müsabiqələrinin qalib olmuşdur. Bu il ali məktəblərə 1121 nəfər qəbul olunub. Qəbul imtahanlarında 50-dən artıq gənc 600-dən yuxarı, 12 nəfər isə 650-dən yuxarı bal toplamışdır. 5 nəfər Prezident təqaüdünə layiq görülmüşdür.
Sonra bir qrup təhsil işçisinə əldə etdikləri uğurlara və rayonun ictimai həyatındakı fəaliyyətinə görə Nəsimi Rayon İcra Hakimiyyətinin fəxri fərmanları təqdim edildi.
H.Sarabski adına Mədəniyyət evi kollektivinin ifasında maraqlı konsert proqramı nümayiş etdirildi.

Ayaz HƏMİDOĞLU, "Xalq qəzeti"