Dünən Xəzər Rayon İcra Hakimiyyətində Müəllimlər Günü münasibətilə təntənəli yığıncaq keçirilmişdir. Rayon icra hakimiyyətinin başçısı Gülağa İslamov çıxış edərək bildirmişdir ki, respublikamızın hər yerində olduğu kimi, Xəzər rayonunda da müstəqillik illərində təhsil sahəsində yüksək nəticələr əldə olunmuşdur.
Təkcə son bir ildə burada 11 məktəb əsaslı təmir olunmuş və əlavə binalar tikilmişdir. Bundan başqa, Heydər Əliyev Fondunun yardımı ilə bir gimnaziya və iki internat məktəb təmir edilmiş, müasir avadanlıq və kompyuterlərlə təchiz edilmişdir.
İcra başçısı fəxrlə bildirmişdir ki, bu il rayonun 459 nəfər şagirdi müxtəlif ali təhsil müəssisələrinə qəbul olunaraq tələbə adını qazanmışdır. Onlardan 11 nəfəri 600-dən yuxarı bal toplamışdır. Hazırda rayonda 35 orta məktəbdə 29 mindən çox şagird təhsil alır ki, onlardan da 3000 nəfəri birinci sinif şagirdidir.
Milli Məclisin deputatı Rauf Əliyev, YAP rayon təşkilatının sədri Namiq Əhmədov və başqaları çıxış edərək Müəllimlər Günü münasibətilə təhsil işçilərini təbrik etmişlər. Tədbirin sonunda bir qrup qabaqcıl təhsil işçisinə rayon icra hakimiyyətinin fəxri fərmanı təqdim olunmuşdur.

T.ƏLİYEV, "Xalq qəzeti"